کرینہ کپور کا تعلیم ادھوری چھوڑنے پر اظہارِ افسوس، بیٹوں کیلئے اہم خواہش کا اظہار
ایک انٹرویو میں کرینہ کپور نے بتایا کہ انہوں نے گیارہویں جماعت کے بعد اپنی تعلیم جاری نہیں رکھی اور فلمی دنیا میں قدم رکھنے کے باعث ان کی تعلیم ادھوری رہ گئی۔
اداکارہ کا کہنا تھا کہ تعلیم مکمل نہ کرنا ایسی بات ہے جو آج بھی ان کے ذہن میں رہتی ہے اور انہیں اس کا افسوس ہے۔ اس وقت انہیں اداکاری کا بے حد شوق تھا اور وہ فلمی دنیا میں آکر خود کو ایک اداکارہ کے طور پر منوانا چاہتی تھیں، اسی لیے انہوں نے اپنے شوق کو ترجیح دیتے ہوئے فلمی کیریئر کا انتخاب کیا۔
کرینہ کپور نے اپنے بیٹوں تیمور اور جے کے حوالے سے بات کرتے ہوئے کہا کہ اپنے ذاتی تجربے کے باعث وہ چاہتی ہیں کہ دونوں پہلے اپنی تعلیم مکمل کریں اور اس کے بعد زندگی میں جس شعبے کو پسند کریں، اسے بطور کیریئر اختیار کریں۔
یہ بھی پڑھیں: ’اسپائیڈر مین ‘ سیریز کے اسٹار نے شادی کر لی، تصاویر سوشل میڈیا پر وائرل
واضح رہے کہ کرینہ کپور نے 2000 میں فلم ’ریفیوجی‘ سے بالی ووڈ میں قدم رکھا تھا۔ بعد ازاں انہوں نے متعدد کامیاب فلموں میں اداکاری کے ذریعے بھارتی فلم انڈسٹری میں اپنی منفرد شناخت بنائی۔
کرینہ کپور نے اداکار سیف علی خان سے 2012 میں شادی کی تھی۔ دونوں کے ہاں 2016 میں بیٹے تیمور علی خان جبکہ 2021 میں جے علی خان کی پیدائش ہوئی۔
دوسری جانب کرینہ کپور کی نئی فلم ’دائرہ‘ (Daayra) بھی رواں ماہ 18 ستمبر کو سنیما گھروں کی زینت بننے والی ہے۔
