’اسپائیڈر مین ‘ سیریز کے اسٹار نے شادی کر لی، تصاویر سوشل میڈیا پر وائرل
جیکب بیٹالون اور ویرونیکا لیہوف کی شادی کی خوبصورت تصاویر اور ویڈیوز سوشل میڈیا پر تیزی سے وائرل ہو رہی ہیں، جنہیں مداحوں کی جانب سے بے حد پسند کیا جا رہا ہے۔
دونوں نے جنوبی فرانس کے تاریخی اور خوبصورت مقام ’چیزو ڈی تورو‘ میں 25 سے 27 اگست تک جاری رہنے والی تین روزہ پروقار تقریب میں شادی کا جشن منایا۔ اس سے قبل جیکب اور ویرونیکا ایک نجی عدالتی تقریب کے ذریعے قانونی طور پر شادی کرچکے تھے۔
شادی کی تقریب میں قریبی رشتہ داروں اور دوستوں سمیت مجموعی طور پر 56 افراد نے شرکت کی۔
جیکب بیٹالون کی شادی میں ’اسپائیڈر مین‘ کے مرکزی اداکار ٹام ہالینڈ اور اداکارہ زینڈایا کی شرکت نے تقریب کو مزید خاص بنا دیا۔ دونوں صفِ اول کے مہمانوں میں شامل تھے۔
فلم میں جیکب بیٹالون کے ساتھی اداکار ریمی ہی، زیک بارک اور ٹونی ریوولوری بھی شادی کی تقریب میں شریک ہوئے اور دلہے کے ’بیسٹ مین‘ کے فرائض انجام دیے۔
وائرل ہونے والی تصاویر میں ویرونیکا لیہوف سفید رنگ کے خوبصورت عروسی لباس میں نظر آئیں، جو معروف ڈیزائنر جالیا لاہو نے تیار کیا تھا، جبکہ جیکب بیٹالون نے شادی کے موقع پر کلاسک بلیک ٹکسڈو زیب تن کیا۔
استقبالیہ کے موقع پر اداکار سفید سوٹ جیکٹ میں بھی دکھائی دیے، جس میں ان کا انداز مداحوں کی توجہ کا مرکز بن گیا۔
جیکب بیٹالون اور ویرونیکا لیہوف کی شادی کے بعد مداح انہیں زندگی کے نئے سفر کے آغاز پر مبارکباد دے رہے ہیں، جبکہ ’اسپائیڈر مین‘ کاسٹ کا ایک جگہ اکٹھا ہونا بھی سوشل میڈیا پر خاصی توجہ حاصل کر رہا ہے۔
