ندیم نانی والا عدالت پیش، ضمانت منظور، مقدمہ خارج
ذرائع کے مطابق ندیم نانی والا کو پولیس سرکاری گاڑی کے بجائے ان کی ذاتی گاڑی میں عدالت لائی جبکہ پولیس اہلکار بھی ملزم کے ہمراہ اس کی پرائیویٹ گاڑ ی میں ہی عدالت پہنچے۔
پولیس کے مطابق گزشتہ رات گرفتار کیے گئے ٹک ٹاکر ندیم نانی والا کو کینٹ کچہری میں پیش کیا گیا جہاں ان کے خلاف ٹریفک وارڈن کی مدعیت میں درج کار سرکار میں مداخلت کے مقدمہ کی سماعت ہوئی۔
بعد ازاں عدالت نے ندیم نانی والا کی ضمانت منظور کرتے ہوئے ان کے خلاف درج مقدمہ خارج کرنے کا حکم دے دیا۔
یاد رہے کہ گزشتہ شب ندیم مبارک عرف نانی والا کے خلاف تھانہ ڈیفنس سی میں ٹریفک وارڈن انسپکٹر محمد فاہد الرحمان کی مدعیت میں مقدمہ درج کیا گیا جس میں غفلت و لاپرواہی سے ڈرائیونگ، کارِ سرکار میں مداخلت اور سرکاری ملازم کو دھمکانے کی دفعات شامل کی گئی تھیں۔
یہ بھی پڑھیں: مشہور ٹک ٹاکر ندیم عرف نانی والا کیخلاف مقدمہ درج
ایف آئی آر کے متن میں لکھا گیا کہ ٹریفک پولیس کی جانب سے ایک لگژری گاڑی کو رکنے کا اشارہ کیا گیا تو ندیم مبارک عرف نانی والا نے گاڑی روکنے کے بجائے ون وے پر بھگا دی، پولیس نے مختلف دفعات کے تحت مقدمہ درج کرکے انہیں گرفتار کیا۔
پولیس ذرائع کے مطابق گرفتاری کے بعد ابتدا میں انہیں ایک کمرے میں بٹھایا گیا، تاہم کچھ دیر بعد حوالات میں بند کر دیا گیا، رات بھر ان سے ملاقات کے لیے کوئی شخص نہیں آیا۔
