مشہور ٹک ٹاکر ندیم عرف نانی والا کیخلاف مقدمہ درج
پولیس کے مطابق مقدمہ ٹریفک قوانین کی خلاف ورزی، لاپرواہی سے گاڑی چلانے، سرکاری امور میں مداخلت اور سرکاری ملازمین کو دھمکانے سمیت مختلف دفعات کے تحت درج کیا گیا ہے۔
پولیس کی جانب سے درج کی گئی ایف آئی آر کے مطابق دورانِ چیکنگ ایک لگژری گاڑی کو روکنے کا اشارہ کیا گیا، تاہم گاڑی کے ڈرائیور نے رکنے کے بجائے تیز رفتاری کا مظاہرہ کرتے ہوئے گاڑی کو ون وے سڑک پر دوڑا دیا، مذکورہ گاڑی پر نمبر پلیٹ بھی موجود نہیں تھی، جس کے باعث اسے روکنے کی کوشش کی گئی تھی۔
ایف آئی آر میں مزید بتایا گیا کہ جب پولیس اہلکاروں نے گاڑی کا تعاقب کیا تو مبینہ طور پر ملزم نے پولیس کی گاڑی کو ٹکر مارنے کی کوشش بھی کی، جس سے صورتحال مزید سنگین ہو گئی۔ واقعے کے بعد ٹریفک پولیس کی مدعیت میں باقاعدہ مقدمہ درج کر کے قانونی کارروائی کا آغاز کر دیا گیا۔
ڈیفنس سی پولیس کا کہنا ہے کہ واقعے کی تمام پہلوؤں سے تحقیقات کی جا رہی ہیں اور قانون کے مطابق کارروائی عمل میں لائی جائے گی۔
دوسری جانب ٹریفک حکام نے واضح کیا ہے کہ بغیر نمبر پلیٹ گاڑیاں چلانے، غیر معیاری نمبر پلیٹس استعمال کرنے اور غیر قانونی طور پر نیلی یا سبز بتی لگانے والوں کیخلاف کریک ڈاؤن جاری رہے گا۔
یہ بھی پڑھیں:معروف اداکار جیمز ہینڈی قاتلانہ حملے میں ہلاک
حکام کا کہنا ہے کہ قانون سب کیلئے برابر ہے، ٹریفک قوانین کی خلاف ورزی کرنے والے کسی بھی شخص کے ساتھ رعایت نہیں برتی جائے گی، خواہ اس کا تعلق کسی بھی شعبے یا حیثیت سے ہو۔
