حال ہی میں اداکارہ مہوش حیات نے غیر ملکی میگزین کو ایک انٹرویو دیا جس میں انہوں نے اپنے کیریئر اور نجی زندگی سے متعلق مختلف موضوعات پر کھل کر اظہار خیال کیا۔
شوبز کیریئر اور مستقبل کی ترجیحات سے متعلق بات کرتے ہوئے مہوش حیات کا کہنا تھا کہ آئندہ چند برسوں میں ہدایتکاری کا ارادہ رکھتی ہوں، ڈرامہ سیٹ پر ہدایتکاروں کے کام کا بغور جائزہ لیتی ہوں تاکہ مستقبل میں مجھے فائدہ ہو سکے۔
انڈسٹری میں اداکاراؤں کی عمروں پر تنقید کے حوالے سے انہوں نے کہا کہ ہماری انڈسٹری میں یہ رواج ہے کہ چاہیے مرد اداکار بڑی عمر کا ہی کیوں نہ ہو وہ اکثر کم عمر اور نئی آنیوالی اداکاراؤں کے ساتھ دکھائی دیتا ہے لیکن لڑکیوں پر قدغنیں لگائی جاتی ہیں، لوگ چاہتے ہیں اداکاراؤں کی عمر رک جائے۔
مہوش حیات کا کہنا تھا کہ عمر کا بڑھنا ایک فطری عمل ہے، کوئی بھی اپنی عمر کو روک نہیں سکتا، سمجھ سے بالاتر ہے کہ آخر اداکاراؤں کی عمر کا تنازع کیوں بنایا جاتا ہے، اداکاراؤں کی محنت اور صلاحیت کو نظر انداز کر کے ان کی عمر پر بحث کی جاتی ہے ۔
اداکارہ نے کہا کہ جو لوگ اداکاراؤں کی عمروں پر تنقید کرتے ہیں یاد رکھیں انہیں بھی اس عمل سے گزرنا ہے، اس لیے خواتین اداکاراؤں کے ساتھ غیر منصفانہ توقعات وابستہ کرنا درست عمل نہیں ہے۔
شادی اور رومانس سے متعلق ایک سوال کا جواب دیتے ہوئے مہوش حیات کا کہنا تھا میں بہت زیادہ رومانوی نہیں ہوں لیکن رومانس پسند ہے، میں حقیقت پسندی پر یقین رکھتی ہوں ، شادی بھی ایسے شخص سے کروں گی جس پر مجھے اعتماد ہو اور وہ مجھے سکون مہیا کرے۔
ان کا کہنا تھا کہ شادی ایک جوا ہے اس لیے جلد بازی میں شادی کا فیصلہ نہیں کروں گی، ایسے شخص سے شادی کروں گی جو میرا ساتھ دے۔
