ممبئی پولیس نے بالی ووڈ کی مشہور اداکارہ کی موت کی تصدیق کرتے ہوئے بتایا کہ ان کی لاش ممبئی کے علاقے اندھیری میں واقع ان کی رہائش گاہ سے ملی۔ ابتدائی اطلاعات کے مطابق ان کا انتقال دل کا دورہ پڑنے کے باعث ہوا، تاہم حتمی وجہ جاننے کے لیے ان کا پوسٹ مارٹم کیا جا رہا ہے۔
شیفالی جریوالا کو ان کے شوہر پراگ تیاگی اور تین دیگر افراد بیلیویو ملٹی اسپیشلٹی ہسپتال لے کر پہنچے تھے، تاہم ہسپتال کے عملے کے مطابق وہ پہلے ہی دم توڑ چکی تھیں۔
یاد رہے شیفالی جریوالا نے 2002 میں ’کانٹا لگا‘ گانے کے ری مکس سے شہرت حاصل کی تھی، جس میں ان کی دلکش پرفارمنس نے نوجوان نسل کو اپنا گرویدہ بنا لیا تھا۔ وہ دراصل کمپیوٹر انجینیئر بننا چاہتی تھیں، لیکن شوبز نے انہیں شہرت کی بلندیوں تک پہنچایا۔ بعد ازاں انہوں نے کئی میوزک ویڈیوز اور فلموں میں بھی کام کیا، تاہم انہیں آج بھی ’کانٹا لگا گرل‘ کے نام سے یاد کیا جاتا ہے۔
2020 میں شیفالی نے سلمان خان کے مشہور ریئلٹی شو ”بگ باس“ میں بھی حصہ لیا تھا، جہاں ان کی شخصیت کو عوام نے خوب سراہا۔ ان کی اچانک موت کی خبر نے شوبز انڈسٹری سمیت مداحوں کو گہرے صدمے میں مبتلا کر دیا ہے۔ ممبئی پولیس نے معاملے کی مکمل چھان بین کا عندیہ دیا ہے، اور پوسٹ مارٹم رپورٹ کے بعد ہی موت کی اصل وجہ سامنے آ سکے گی۔
