ویناملک ان دنوں ٹک ٹاکر شہریار چوہدری کے ساتھ تعلق کے باعث خبروں کی سرخیوں میں ہیں،جو ان سے عمر میں چھ سال چھوٹے ہیں،دونوں کے درمیان تحفے تحائف دینے کا سلسلہ بھی جاری ہوا ہے،جسے سوشل میڈیا پر بھی دیکھا جاسکتا ہے۔
وینا ملک کے مداح ان کے شہریار چوہدری کا صرف سوشل میڈیا اکاؤنٹ ہینڈل ہی جانتے ہیں،وہ ٹک ٹاک پر ویڈیو کانٹینٹ تو بناتے ہیں،مگر شہریار چوہدری کا چہرہ اب تک کسی نے بھی نہیں دیکھا،وہ سوشل میڈیا اکاؤنٹس پر ہوکر بھی سب کی نظروں سے اوجھل رہتے ہیں،جبکہ وہ پیشے کے اعتبار سے بزنس مین اور انٹرپرینئر ہیں۔
حال ہی میں انڈیپینڈنٹ اردو سے کی گئی بات چیت کے دوران جہاں وینا نے شوبز سے عارضی طور پر وقفے اور اپنی ذاتی زندگی کے اتار چڑھاؤ پر گفتگو کی،وہیں اپنی زندگی میں آنے والے مسٹری مین شہریار چوہدری کے حوالے سے بھی کئی انکشافات کیے ہیں۔
شہریار چوہدری کے بارے میں وینا ملک کا کہنا تھا کہ انھوں نے مجھے زندگی کا ایک مثبت اور منفرد پہلو دکھایا،شہریار کا قرآن پاک کا حافظ ہونا مجھے سب سے زیادہ بھایا ہے۔
وینا ملک نے دعویٰ کیا کہ شہریار اور میں ایک ساتھ بےحد خوبصورت لگتے ہیں،اسی وجہ سے اب میں بالی وڈ کے گانے زیادہ سننے لگی ہوں،جبکہ شہریار بے پناہ مصروفیت کے باوجود بھی میرے لیے سوشل میڈیا استعمال کرتے ہیں۔
وینا ملک کا مزید کہنا تھا کہ شہریار چوہدری کی لکھائی بہت خوبصورت،آواز بہت سُریلی اور وہ گانا بہت اچھا گاتے ہیں۔
دوسری جانب میڈیا سے عارضی وقفہ لینے پر وینا ملک نے کہا کہ میں نے اس دوران اپنی توجہ صرف تعلیم پر مرکوز رکھی اور نفسیات میں بیچلرز کی ڈگری حاصل کرنے کے ساتھ ساتھ ماسٹرز کے امتحانات بھی دیے جس کارزلٹ ابھی تک نہیں آیا۔
