ہینڈسم اداکار دانش تیمور نے حال ہی میں جیو نیوز پر نشر ہونے والے مزاحیہ پروگرام ’مذاق رات‘ میں شرکت کے دوراناپنی گفتگو میں بہت سارے معاملات پر کھل کر بات چیت کی ہے۔
پروگرام کے دوران انہوں نے انکشاف کیا ہے کہ کسی دور میں مشہور بھارتی اداکارہ ریکھا ان کا کرش رہی ہیں،وہ ان پر دل و جان سے فدا تھے۔
ایک سوال کے جواب میں انہوں نے کہا کہ وہ زیادہ تر ٹی وی شوز میں اس لیے نہیں جاتے کیونکہ وہاں اداکاروں سے ہی دیگر اداکاروں بارے میں نامناسب سوالات کیے جاتے ہیں اور آن اسکرین بولنے پر مجبور کیا جاتا ہے۔
انہوں نے کہا کہ کوئی کتنا بھی بڑا اور اچھا اداکار کیوں نہ ہو،مگر اسے دوسرے اداکاروں کے بارے میں آن اسکرین غلط باتیں کرنے کا ہرگز اختیار نہیں،ایسا نہیں کیا جانا چاہیے۔
دانش تیمور کے مطابق جو اداکار آن اسکرین دیگر اداکاروں کو تنقید کا نشانہ بنانت ہیں،ان کے پاس اس اداکار کا فون نمبر بھی ہوتا ہے،وہ انہیں فون پر بھی وہی باتیں بتا سکتے ہیں،لیکن آن اسکرین انہیں ایسا ہرگز نہیں کرنا چاہیے۔
اسی حوالے سے گفتگو کرتے ہوئے دانش تیمور نے مختلف ڈراموں پر تبصرے کرنے والے اداکاروں کو بھی آڑے ہاتھوں لیا اور کہا کہ کچھ ایسے لوگ بھی ڈراموں پر تبصرے اور تنقید کر رہے ہوتے ہیں،جنہیں اداکاری کے اے کا بھی علم نہیں ہوتا۔
دانش تیمور نے پوچھے جانے والے ایک سوال کے جواب میں بتایا کہ انہوں نے کسی پبلک ریلیشن (پی آر) ایجنسی کی خدمات نہیں لے رکھیں،انہیں ایسی چیزوں کی ضرورت ہی نہیں ہے۔
اداکار نے پروگرام میں بات کرتے ہوئے مزید کہا کہ کیریئر کے آغاز پر وہ موٹر سائیکل پر ڈراموں کے آڈیشن دینے جایا کرتے تھے۔ان کا کہنا تھا کہ وہ جہاں آڈیشن دینے جاتے تھے،اس جگہ سے بہت دور موٹر سائیکل کھڑی کرتے تھے۔
دانش تیمور نے بتایا کہ انہوں نے کیریئر کے آغاز میں سخت مشکلات کا سامنا کیا ہے،انہیں کافی عرصے تک بطور ہیرو کاسٹ نہیں کیا گیا۔
انہوں نے انکشاف کیا کہ انہیں بعض ڈراما ساز بتاتے تھے کہ ان کیلئے فلاں اداکار نے فون کرکے کہا ہے کہ انہیں کاسٹ نہیں کرنا۔
اگرچہ دانش تیمور نے اس بات کا انکشاف کیا ہے کہ انہیں اداکار فون کرکے ڈراموں سے نکلوا دیا کرتے تھے،تاہم انہوں نے کسی بھی اداکار کا نام نہیں لیا۔
