ایل پی جی کی قیمتوں میں ہوشربا اضافہ
پشاور سمیت مختلف علاقوں میں ایل پی جی 600 سے 700 روپے فی کلو تک فروخت کی جا رہی ہے، جس کے باعث گھریلو صارفین کی مشکلات بڑھ گئی ہیں۔
ایل پی جی کی قیمتوں میں مسلسل اضافے نے شہریوں کو پریشانی میں مبتلا کردیا ہے۔ گیس کی فراہمی میں مشکلات کے باعث ایل پی جی استعمال کرنے والے صارفین کو مہنگے داموں گیس خریدنا پڑ رہی ہے، جس سے ان کے گھریلو اخراجات میں بھی اضافہ ہوگیا ہے۔
ایل پی جی ایسوسی ایشن کے صدر رحمان نے گیس کی بڑھتی ہوئی قیمتوں پر تشویش کا اظہار کرتے ہوئے حکومت سے فوری نوٹس لینے کا مطالبہ کیا ہے۔
ان کا کہنا ہے کہ پرانا ٹھیکہ داری نظام ختم کیے بغیر ایل پی جی کی قیمتوں میں استحکام ممکن نہیں۔ حکومت کو چاہیے کہ اس نظام کا خاتمہ کرکے عوام کو ریلیف فراہم کرے تاکہ شہریوں کو مناسب قیمت پر گیس دستیاب ہوسکے۔
صدر ایل پی جی ایسوسی ایشن نے وزیراعظم اور گورنر خیبرپختونخوا سے بھی اپیل کی ہے کہ وہ صوبے میں ایل پی جی کی قیمتوں میں غیر معمولی اضافے کا نوٹس لیں اور صارفین کو مہنگی گیس سے نجات دلانے کے لیے مؤثر اقدامات کریں۔
یہ بھی پڑھیں:سونے کی قیمت میں بڑی کمی، فی تولہ کتنے کا ہوگیا؟
شہریوں کا کہنا ہے کہ مہنگائی کے موجودہ دور میں ایل پی جی کی قیمتوں میں مزید اضافہ ان کے لیے مشکلات پیدا کر رہا ہے۔ صارفین نے حکومت سے مطالبہ کیا ہے کہ قیمتوں کو کنٹرول کرنے اور ناجائز منافع خوری روکنے کے لیے فوری کارروائی کی جائے۔
