گیس کی لوڈشیڈنگ سے تنگ نانبائیوں کا احتجاج کا اعلان
ایسوسی ایشن کے مطابق 15 ستمبر کو سوئی ناردرن گیس پائپ لائن لمیٹڈ (SNGPL) کے گورومانگٹ آفس کے باہر احتجاج کیا جائے گا، جس میں شہر بھر کے تندور مالکان شرکت کریں گے۔
نانبائیوں کا کہنا ہے کہ ان کا کاروبار بنیادی طور پر گیس کی فراہمی سے منسلک ہے، تاہم حالیہ دنوں میں بدترین لوڈشیڈنگ کے باعث تندور چلانا انتہائی مشکل ہوگیا ہے۔ گیس کی مسلسل بندش سے نہ صرف کاروباری سرگرمیاں متاثر ہورہی ہیں بلکہ روزانہ کے اخراجات پورے کرنا بھی مشکل ہوتا جارہا ہے۔
متحدہ نان روٹی ایسوسی ایشن کے نمائندوں کا کہنا ہے کہ گیس کی عدم دستیابی کے باعث تندور مالکان کو متبادل ایندھن کے طور پر ایل پی جی استعمال کرنا پڑ رہی ہے، تاہم ایل پی جی بھی سرکاری نرخ پر دستیاب نہیں۔
نانبائیوں کا کہنا ہے کہ مارکیٹ میں مہنگی ایل پی جی خریدنے سے ان کے کاروباری اخراجات میں نمایاں اضافہ ہوگیا ہے، جس کے باعث موجودہ حالات میں کاروبار جاری رکھنا مشکل ہوتا جارہا ہے۔
ایسوسی ایشن نے حکومت اور متعلقہ حکام سے مطالبہ کیا ہے کہ تندوروں کیلئے گیس کی لوڈشیڈنگ کا فوری خاتمہ کیا جائے اور انہیں بلا تعطل گیس کی فراہمی یقینی بنائی جائے۔
یہ بھی پڑھیں:اسٹاک مارکیٹ کا نیا سہولت اکاؤنٹ اب صرف ایک دن میں کھلے گا
نان روٹی ایسوسی ایشن کی جانب سے واضح کیا گیا کہ 15 ستمبر کا احتجاج اپنے مطالبات کے حق میں کیا جائے گا اور شہر بھر کے تندور مالکان اس میں شرکت کریں گے۔
ایسوسی ایشن کا کہنا ہے کہ اگر ہمارے مطالبات تسلیم نہ کیے گئے تو احتجاج کا دائرہ مزید وسیع کرنے سمیت آئندہ کا لائحہ عمل طے کیا جائے گا۔
