پرانی بائیک دیں اور نئی لے جائیں،ہونڈا نے بڑی آفر کا اعلان کردیا
ایکسچینج پروگرام خاص طور پر ان موٹر سائیکل مالکان کیلئے متعارف کرایا گیا ہے جو پرانی بائیک کی مسلسل مرمت، دیکھ بھال کے بڑھتے اخراجات یا کم ہوتی کارکردگی سے پریشان ہیں۔ اس سہولت کے ذریعے صارفین کو پہلے اپنی پرانی موٹر سائیکل فروخت کرنے اور پھر نئی موٹر سائیکل خریدنے کی زحمت نہیں کرنا پڑے گی۔
ایکسچینج کے لیے صارف کو اپنی پرانی سی ڈی 70 مجاز ایٹلس ہونڈا 3 ایس ڈیلرشپ پر لے جانا ہوگی۔ وہاں تکنیکی عملہ موٹر سائیکل کے انجن، فریم، ماڈل، مکینیکل حالت اور مجموعی ظاہری حالت کا جائزہ لے کر اس کی ایکسچینج ویلیو مقرر کرے گا۔
اہم بات یہ ہے کہ پرانی سی ڈی 70 کے لیے کوئی مقررہ ایکسچینج قیمت طے نہیں کی گئی۔ موٹر سائیکل کی حتمی قیمت اس کی عمر، حالت اور دیگر عوامل کو مدنظر رکھتے ہوئے ڈیلرشپ پر مقرر کی جائے گی۔
رپورٹس کے مطابق نئی ہونڈا سی ڈی 70 کی موجودہ قیمت 1 لاکھ 59 ہزار 900 روپے ہے۔ پرانی موٹر سائیکل کی طے شدہ قیمت نئی بائیک کی قیمت سے منہا کردی جائے گی اور صارف کو صرف باقی رقم ادا کرنا ہوگی۔
مثال کے طور پر اگر پرانی بائیک کی ایکسچینج ویلیو 80 ہزار روپے مقرر ہوتی ہے تو نئی سی ڈی 70 کی قیمت میں سے یہ رقم منہا ہونے کے بعد صارف کو 79 ہزار 900 روپے ادا کرنا ہوں گے، تاہم اصل رقم ڈیلرشپ کی حتمی تشخیص پر منحصر ہوگی۔
یہ بھی پڑھیں:بیرسٹر گوہر کی رجسٹرار سپریم کورٹ سے ملاقات
دلچسپی رکھنے والے صارفین کو مشورہ دیا گیا ہے کہ قریبی مجاز ایٹلس ہونڈا ڈیلرشپ سے رابطہ کرکے ایکسچینج کی شرائط، اپنی بائیک کی قیمت اور قابلِ ادائیگی رقم کی تصدیق کریں
