ملک بھر میں ایک ہفتے میں پیٹرول 16 روپے فی لیٹر مہنگا
17 جولائی کو کابینہ کے فیصلے کے تحت اوگرا عالمی منڈی میں قیمتوں کو مدنظر رکھتے ہوئے پیٹرولیم مصنوعات کے نرخ یومیہ بنیاد پر طے کرتا ہے۔ 18 سے 22 اگست کے دوران ڈیزل 16 روپے 97 پیسے فی لیٹر مہنگا ہوا جبکہ ایک روز کے لیے 32 روپے 63 پیسے سستا کیا گیا۔ یوں صارفین کو پانچ دنوں میں مجموعی طور پر صرف 15 روپے 66 پیسے کا ریلیف مل سکا۔
اسی طرح پانچ دنوں میں پیٹرول 16 روپے 16 پیسے فی لٹر مہنگا ہوا اور اس دوران کوئی ریلیف نہیں دیا گیا۔ 18 اگست کو ڈیزل کی قیمت میں 6 روپے 47 پیسے فی لیٹر اضافہ کیا گیا جس کے بعد نئی قیمت 390 روپے 42 پیسے مقرر ہوئی۔ 19 اگست کو مزید 5 روپے 27 پیسے اضافے کے بعد قیمت 395 روپے 69 پیسے فی لیٹر ہوگئی۔
20 اگست کو ایک روز کے لیے ڈیزل کی قیمت میں 32 روپے 63 پیسے فی لیٹر کمی کی گئی جس سے قیمت 363 روپے 6 پیسے ہوگئی۔ 21 اگست کو ڈیزل 1 روپے 64 پیسے مہنگا کر کے قیمت 364 روپے 70 پیسے جبکہ 22 اگست کو مزید 3 روپے 59 پیسے اضافے کے بعد قیمت 368 روپے 29 پیسے فی لیٹر مقرر کی گئی۔
یہ بھی پڑھیں: پاکستان میں تیل کی درآمد کا نیا راستہ کھل گیا
پیٹرول کی قیمت میں 18 اگست کو 5 روپے 77 پیسے فی لیٹر اضافہ کیا گیا، جس کے بعد نئی قیمت 331 روپے 20 پیسے مقرر ہوئی۔ 19 اگست کو مزید 3 روپے 34 پیسے اضافے سے قیمت334 روپے 54 پیسے ، 20 اگست کو 2 روپے 97 پیسے اضافے سے 337 روپے 51 پیسے اور 21 اگست کو 27 پیسے اضافے سے 337 روپے 78 پیسے فی لیٹر ہوگئی۔ 22 اگست کو پیٹرول کی قیمت میں مزید 3 روپے 81 پیسے اضافہ کیا گیا جس کے بعد نئی قیمت 341 روپے 59 پیسے فی لیٹر مقرر ہوئی۔
ہفتہ اور اتوار کو تعطیل کے باعث قیمتوں کا تعین نہیں کیا جاتا۔ پیر سے جمعہ تک دوبارہ پیٹرول اور ڈیزل کی قیمتیں یومیہ بنیاد پر طے کی جائیں گی جس کے بعد معلوم ہوگا کہ رواں ہفتے صارفین کو کتنا ریلیف ملتا ہے۔
واضح رہے کہ وزیراعظم کی ہدایت پر ریفائنریز سے بات چیت کے نتیجے میں ڈیزل ایک روز کے لیے سستا کیا گیا تاہم اگلے دو روز میں اس کی قیمت دوبارہ بڑھانا پڑی۔
