سونے کی قیمت میں تیسرے روز بھی بڑا اضافہ
آل پاکستان صرافہ ایسوسی ایشن کے مطابق ملک میں 24 قیراط فی تولہ سونے کی قیمت 5 ہزار 700 روپے اضافے کے بعد 4 لاکھ 82 ہزار 936 روپے ہوگئی۔ سونے کی قیمت میں مسلسل اضافے کے باعث زیورات کی خریداری کرنے والے صارفین کے اخراجات میں بھی نمایاں اضافہ ہوگیا ہے۔
جاری کردہ اعداد و شمار کے مطابق 10 گرام سونے کی قیمت میں بھی 4 ہزار 972 روپے کا بڑا اضافہ ریکارڈ کیا گیا، جس کے بعد 10 گرام سونے کی نئی قیمت 4 لاکھ 14 ہزار 39 روپے مقرر ہوگئی ہے۔
دوسری جانب عالمی منڈی میں بھی سونے کی قیمت میں نمایاں اضافہ دیکھا گیا، عالمی مارکیٹ میں سونے کی قیمت 57 ڈالر اضافے کے بعد 4 ہزار 604 ڈالر فی اونس کی سطح پر پہنچ گئی۔
معاشی ماہرین کا کہنا ہے کہ عالمی مارکیٹ میں سونے کی قیمت میں ہونے والی تبدیلیوں کا براہ راست اثر مقامی صرافہ مارکیٹ پر پڑتا ہے، جس کے باعث پاکستان میں بھی سونے کے نرخوں میں اتار چڑھاؤ جاری رہتا ہے۔
سونے کی قیمت میں مسلسل تیسرے روز اضافے کے بعد شہریوں میں تشویش پائی جارہی ہے، خصوصاً وہ افراد جو شادی بیاہ یا دیگر تقریبات کیلئے سونے کے زیورات خریدنے کا ارادہ رکھتے ہیں۔
دوسری جانب چاندی کی قیمت میں کوئی تبدیلی نہیں ہوئی، فی تولہ چاندی 7 ہزار 379 روپے کی سطح پر برقرار رہی۔
یہ بھی پڑھیں:گھی اور کوکنگ آئل کی قیمتوں میں اضافہ
یوں سونے کی قیمت میں مسلسل تیسرے روز اضافے نے مقامی مارکیٹ میں قیمتی دھات کی خریداری مزید مہنگی کردی ہے، جبکہ عالمی مارکیٹ میں بھی قیمتوں میں تیزی کا رجحان برقرار ہے۔
