ٹماٹر کی قیمتوں میں ہوشربا اضافہ
وفاقی دارالحکومت اسلام آباد میں ٹماٹر کی قیمت 400 روپے فی کلو تک پہنچ گئی، جبکہ کراچی میں بھی یہ 450 سے 500 روپے فی کلو فروخت ہونے لگا ہے، جس کے باعث شہری شدید پریشانی کا شکار ہیں۔
اتوار کے روز ہفتہ وار خریداری کیلئے سبزی منڈیوں اور بازاروں کا رخ کرنے والے شہریوں کو ٹماٹر کی بلند قیمتوں نے حیران کر دیا۔
اسلام آباد میں مختلف مارکیٹوں میں ٹماٹر 277 روپے سے 400 روپے فی کلو تک فروخت کیا جا رہا ہے۔ خریداروں کا کہنا ہے کہ کم قیمت پر دستیاب ٹماٹر کا معیار بہتر نہیں، جبکہ معیاری ٹماٹر خریدنے کیلئے 400 روپے فی کلو ادا کرنا پڑ رہے ہیں۔
سبزی فروشوں کے مطابق ٹماٹر کی قیمتوں میں اضافے کی بڑی وجوہات بارڈر کی بندش، سپلائی میں کمی اور مقامی پیداوار کا متاثر ہونا ہیں، طلب کے مقابلے میں رسد کم ہونے کے باعث قیمتوں میں مسلسل اضافہ ہو رہا ہے، جس کا براہ راست اثر صارفین پر پڑ رہا ہے۔
دوسری جانب کراچی میں بھی ٹماٹر کی قیمتیں نئی بلند ترین سطح پر پہنچ گئی ہیں، مختلف مارکیٹوں میں ایرانی اور کوئٹہ سے آنے والے ٹماٹر 450 سے 500 روپے فی کلو، جبکہ 110 سے 125 روپے فی پاؤ کے حساب سے فروخت کیے جا رہے ہیں۔
شہریوں کا کہنا ہے کہ مہنگائی کے اس دور میں روزمرہ استعمال کی بنیادی سبزی بھی ان کی پہنچ سے دور ہوتی جا رہی ہے۔
واضح رہے کہ سبزیوں اور دیگر اشیائے خورونوش کی قیمتوں میں مسلسل اضافہ عام آدمی کے گھریلو بجٹ پر اضافی دباؤ ڈال رہا ہے۔
یہ بھی پڑھیں:خام تیل کی قیمتوں میں کمی کا رجحان
شہریوں نے حکومت سے مطالبہ کیا ہے کہ ٹماٹر سمیت ضروری اشیائے خورونوش کی قیمتوں کو کنٹرول کرنے، سپلائی چین کو بہتر بنانے اور ذخیرہ اندوزی کیخلاف مؤثر کارروائی کی جائے تاکہ عوام کو مہنگائی سے کچھ ریلیف مل سکے۔
