سونے کی قیمتوں میں معمولی اضافہ
آل پاکستان صرافہ ایسوسی ایشن کے جاری کردہ تازہ اعداد و شمار کے مطابق ملک بھر میں 24 قیراط فی تولہ سونے کی قیمت 300 روپے اضافے کے بعد 4 لاکھ 27 ہزار 736 روپے ہوگئی، اسی طرح 10 گرام سونے کی قیمت 257 روپے بڑھنے سے 3 لاکھ 66 ہزار 714 روپے تک پہنچ گئی۔
دوسری جانب مقامی صرافہ مارکیٹ میں چاندی کی قیمت میں کمی کا رجحان برقرار رہا۔ فی تولہ چاندی 12 روپے سستی ہوکر 6 ہزار 297 روپے کی سطح پر آگئی، جس سے سرمایہ کاروں اور خریداروں کی توجہ بھی اس جانب مبذول ہوئی ہے۔
عالمی مارکیٹ میں بھی سونے کی قیمت میں معمولی بہتری ریکارڈ کی گئی، جہاں فی اونس سونا 3 ڈالر اضافے کے بعد 4 ہزار 53 ڈالر پر ٹریڈ ہونے لگا۔ عالمی مالیاتی منڈیوں میں اتار چڑھاؤ، امریکی ڈالر کی قدر اور سرمایہ کاروں کی محفوظ سرمایہ کاری کی جانب بڑھتی دلچسپی سونے کی قیمتوں پر اثر انداز ہو رہی ہے۔
یہ بھی پڑھیں:ایف بی آر کا انکم ٹیکس ریٹرنز جمع کرانے سے متعلق اہم اعلان
واضح رہے کہ گزشتہ روز عالمی اور مقامی دونوں مارکیٹوں میں سونے کی قیمت میں نمایاں کمی دیکھی گئی تھی، عالمی منڈی میں فی اونس سونا 46 ڈالر سستا ہوکر 4 ہزار 50 ڈالر تک آگیا تھا، جبکہ پاکستان میں فی تولہ سونے کی قیمت 4 ہزار 600 روپے کم ہوکر 4 لاکھ 27 ہزار 436 روپے ہوگئی تھی، اسی طرح 10 گرام سونا 3 ہزار 944 روپے سستا ہونے کے بعد 3 لاکھ 66 ہزار 457 روپے پر پہنچ گیا تھا، جبکہ فی تولہ چاندی 61 روپے کمی کے بعد 6 ہزار 309 روپے کی سطح پر آگئی تھی۔
