پیٹرول اور ڈیزل کی قیمتیں اب روزانہ تبدیل ہوں گی؟
ذرائع کے مطابق حکومت نے پیٹرولیم مصنوعات کی قیمتوں کیلئے ایک نیا طریقہ کار متعارف کرانے کی تجویز پر غور شروع کر دیا ہے۔ مجوزہ نظام کے تحت قیمتوں کے تعین میں حکومت کا براہِ راست کردار محدود ہو جائے گا، جبکہ یہ ذمہ داری مکمل طور پر آئل اینڈ گیس ریگولیٹری اتھارٹی (اوگرا) کو سونپنے کی تجویز دی گئی ہے۔
پیٹرولیم ڈویژن کے ایک اعلیٰ عہدیدار کے مطابق اگر یہ نظام نافذ ہو جاتا ہے تو اوگرا ہر روز رات کے وقت عالمی منڈی کی صورتحال، درآمدی لاگت اور دیگر متعلقہ عوامل کا جائزہ لے کر موٹر اسپرٹ (پیٹرول)، ہائی اسپیڈ ڈیزل، لائٹ ڈیزل آئل اور مٹی کے تیل کی نئی قیمتوں کا تعین کرے گی۔
مجوزہ منصوبے کے تحت اوگرا کی جانب سے جاری کی جانے والی قیمتیں ہر روز رات 12 بجے سے نافذ العمل ہوں گی، جس کے بعد ملک بھر میں پیٹرول پمپ نئی قیمتوں کے مطابق ایندھن فروخت کریں گے۔
روزانہ قیمتوں کے تعین کا مقصد عالمی منڈی میں خام تیل کی قیمتوں میں ہونے والے اتار چڑھاؤ کو فوری طور پر مقامی مارکیٹ میں منتقل کرنا ہے، تاکہ قیمتوں کے تعین کا نظام زیادہ شفاف اور مؤثر بنایا جا سکے۔
یہ بھی پڑھیں:عالمی منڈی میں خام تیل کی قیمتیں پھر بڑھ گئیں
تاہم اس حوالے سے ابھی تک حکومت کی جانب سے حتمی منظوری یا باضابطہ نوٹیفکیشن جاری نہیں کیا گیا، اگر اس تجویز کی منظوری ملتی ہے تو پاکستان میں پیٹرولیم مصنوعات کی قیمتوں کے تعین کے موجودہ نظام میں یہ ایک بڑی تبدیلی تصور کی جائے گی۔
