کراچی سمیت ملک بھر میں بجلی مزید مہنگی ہونے کا امکان
سینٹرل پاور پرچیزنگ ایجنسی (سی پی پی اے) نے بجلی 82 پیسے فی یونٹ مہنگی کرنے کے لیے نیشنل الیکٹرک پاور ریگولیٹری اتھارٹی (نیپرا) میں درخواست جمع کرا دی۔
سی پی پی اے کی جانب سے درخواست مئی کے ماہانہ فیول پرائس ایڈجسٹمنٹ کی مد میں جمع کرائی گئی ہے جس پر نیپرا اتھارٹی کل سماعت کرے گی۔
سماعت کے دوران درخواست میں شامل اعداد و شمار، بجلی کی پیداواری لاگت، ایندھن کے استعمال اور صارفین پر ممکنہ اثرات کا جائزہ لیا جائے گا۔
درخواست منظور ہونے کی صورت میں بجلی صارفین پر تقریباً 12 ارب روپے کا اضافی مالی بوجھ پڑنے کا امکان ہے۔
سی پی پی اے کے مطابق مئی کے دوران مجموعی طور پر 12 ارب 63 کروڑ 80 لاکھ یونٹس بجلی پیدا کی گئی، مئی میں بجلی کی اوسط فیول لاگت 9 روپے 25 پیسے فی یونٹ رہی جبکہ اس ماہ کے لیے فی یونٹ فیول لاگت کا تخمینہ 8 روپے 43 پیسے لگایا گیا تھا۔
حکام کے مطابق پیداواری لاگت میں فرق کے باعث صارفین سے اضافی وصولی کی درخواست کی گئی ہے۔
یہ بھی پڑھیں: امریکہ اور ایران کے حملوں کے بعد عالمی منڈی میں تیل مہنگا
اعداد و شمار کے مطابق مئی کے دوران پانی سے 33.27 فیصد بجلی پیدا کی گئی، مقامی کوئلے سے 11.66 فیصد، درآمدی کوئلے سے 13.54 فیصد، فرنس آئل سے 0.16 فیصد جبکہ مقامی گیس سے 8.31 فیصد بجلی حاصل کی گئی۔
نیپرا حکام درخواست کا تفصیلی جائزہ لینے کے بعد فیصلہ جاری کریں گے، منظوری کی صورت میں اضافی رقم صارفین کے آئندہ بلوں میں وصول کی جا سکتی ہے۔
