مرغی اور انڈوں کی قیمتوں کو پَر لگ گئے
سرکاری نرخنامہ جاری ہونے کے باوجود بازاروں میں اشیائے خور و نوش مقررہ قیمتوں سے زیادہ نرخوں پر فروخت کی جا رہی ہیں، جس پر شہریوں نے شدید تشویش کا اظہار کیا ہے۔
رپورٹس کے مطابق مرغی کے گوشت کی سرکاری قیمت 432 روپے فی کلو مقرر کی گئی ہے، تاہم اوپن مارکیٹ میں دکاندار سرکاری نرخوں کو نظر انداز کرتے ہوئے چکن 450 سے 470 روپے فی کلو تک فروخت کر رہے ہیں۔
دوسری جانب فارمی انڈوں کی قیمتوں میں بھی اضافہ ریکارڈ کیا گیا ہے،سرکاری نرخنامے کے مطابق انڈوں کی قیمت 217 روپے فی درجن مقرر ہے، لیکن مختلف مارکیٹوں میں انڈے 225 سے 235 روپے فی درجن تک فروخت کیے جا رہے ہیں۔
شہریوں کا کہنا ہے کہ روزمرہ استعمال کی بنیادی غذائی اشیا کی قیمتوں میں مسلسل اضافہ ان کے گھریلو بجٹ کو شدید متاثر کر رہا ہے۔
یہ بھی پڑھیں:یکم جولائی سے تنخواہ پر کتنا ٹیکس کٹے گا؟ نئے سیلبز متعارف
شہریوں نے ضلعی انتظامیہ اور متعلقہ اداروں سے مطالبہ کیا ہے کہ سرکاری نرخنامے پر سختی سے عملدرآمد یقینی بنایا جائے اور گرانفروشی میں ملوث عناصر کیخلاف مؤثر کارروائی کی جائے۔
ان کا کہنا ہے کہ اگر قیمتوں کو قابو میں نہ رکھا گیا تو عام آدمی کیلئے بنیادی غذائی ضروریات پوری کرنا مزید مشکل ہو جائے گا۔
