ایرانی ریال کی قیمت میں نمایاں تیزی، پاکستانیوں کی غیر معمولی دلچسپی

کرنسی مارکیٹ ذرائع کے مطابق گزشتہ چند روز، خصوصاً پانچ سے چھ دن کے دوران، شہریوں کی بڑی تعداد نے ایرانی ریال کی خریداری میں غیر معمولی دلچسپی ظاہر کی، جس سے مارکیٹ کے رجحانات واضح طور پر متاثر ہوئے ہیں۔

ذرائع کا کہنا ہے کہ طلب میں اضافے کے باعث اوپن مارکیٹ میں ایرانی ریال کی قدر مسلسل بڑھ رہی ہے اور اندازوں کے مطابق اس کی قیمت میں تقریباً 100 فیصد اضافہ ہو چکا ہے، یعنی اس کی مالیت تقریباً دوگنا ہو گئی ہے۔

ایکسچینج کمپنیز ایسوسی ایشن آف پاکستان کے چیئرمین ملک بوستان کے مطابق نئی صورتحال کے بعد صرف چھ دنوں کے اندر پاکستانی شہریوں نے اوپن مارکیٹ سے تقریباً 3 ٹریلین روپے سے زائد مالیت کی ایرانی کرنسی خریدی ہے۔ ان کا کہنا تھا کہ خریداروں میں زیادہ تر متوسط طبقے سے تعلق رکھنے والے سرمایہ کار شامل ہیں۔

یہ بھی پڑھیں: یکم جولائی سے تنخواہ پر کتنا ٹیکس کٹے گا؟ نئے سیلبز متعارف

ملک بوستان نے بتایا کہ غیر معمولی خریداری کے رجحان کے باعث اوپن مارکیٹ میں ایرانی ریال کی قیمت میں نمایاں اضافہ ہوا ہے۔ ان کے مطابق ایک کروڑ ایرانی ریال، جو چند روز قبل تقریباً دو ہزار پاکستانی روپے میں دستیاب تھے، اب تقریباً چار ہزار روپے میں فروخت ہو رہے ہیں۔

انہوں نے مزید کہا کہ تہران اور واشنگٹن کے درمیان ممکنہ معاہدے سے متعلق خبروں نے کرنسی مارکیٹ میں قیاس آرائیوں کو فروغ دیا ہے، جس کے نتیجے میں ایرانی ریال کی طلب میں مزید اضافہ دیکھنے میں آیا ہے۔

چیئرمین ای سی اے پی نے عوام کو مشورہ دیا کہ کرنسی کی خرید و فروخت صرف لائسنس یافتہ ایکسچینج کمپنیوں کے ذریعے کی جائے تاکہ کسی بھی قسم کی دھوکہ دہی یا غیر قانونی لین دین سے محفوظ رہا جا سکے۔