ایران امریکا معاہدے کے باوجود تیل کی قیمتوں میں اضافہ
بین الاقوامی تجارتی اعداد و شمار کے مطابق منگل کے روز برینٹ خام تیل کے فیوچر معاہدوں کی قیمت میں 26 سینٹ کا اضافہ ہوا، جس کے بعد یہ 83.42 ڈالر فی بیرل تک پہنچ گیا۔
اسی طرح امریکی ویسٹ ٹیکساس انٹرمیڈیٹ (WTI) خام تیل کی قیمت 46 سینٹ بڑھ کر 81.12 ڈالر فی بیرل ہو گئی۔
یاد رہے کہ گزشتہ روز تیل کی قیمتوں میں تقریباً پانچ فیصد کمی دیکھی گئی تھی، جب امریکی صدر ڈونلڈ ٹرمپ نے اعلان کیا تھا کہ امریکا اور ایران کے درمیان ایک مفاہمتی یادداشت پر دستخط ہو چکے ہیں، جس کا مقصد دونوں ممالک کے درمیان جاری کشیدگی اور جنگی صورتحال کا خاتمہ ہے۔
تاہم سرمایہ کار اب بھی محتاط رویہ اختیار کیے ہوئے ہیں کیونکہ معاہدے کی مکمل تفصیلات منظرعام پر نہیں آئیں اور مستقل جنگ بندی کیلئے حتمی معاہدہ تاحال طے نہیں پایا۔
ابتدائی اطلاعات کے مطابق مجوزہ معاہدے میں آبنائے ہرمز کو دوبارہ کھولنے اور 60 روزہ جنگ بندی میں توسیع کی شقیں شامل ہیں تاکہ ایران کے جوہری پروگرام سمیت دیگر حساس معاملات پر مذاکرات جاری رہ سکیں۔
ایرانی صدر مسعود پزشکیان نے اس پیش رفت کو مثبت قرار دیتے ہوئے کہا ہے کہ یہ لڑائی روکنے کی جانب ایک اہم قدم ہے، تاہم خطے میں پائیدار امن کے قیام کیلئے مزید سفارتی کوششوں کی ضرورت ہے۔
دوسری جانب ایک سینئر ایرانی عہدیدار نے عندیہ دیا ہے کہ حتمی معاہدے تک ایران اپنی جوہری سرگرمیوں کو محدود رکھے گا۔
یہ بھی پڑھیں:پاکستان اور عالمی منڈی میں سونے کی قیمتوں میں بڑا اضافہ
مارکیٹ ماہرین کا کہنا ہے کہ اگرچہ موجودہ معاہدہ عالمی منڈی کیلئے ایک مثبت اشارہ ہے، لیکن تیل کی سپلائی کو مکمل طور پر بحال ہونے میں وقت لگ سکتا ہے۔
ماہرین کے مطابق بحری راستوں کی صفائی، بحری انشورنس کی بحالی، جہاز رانی کمپنیوں کے اعتماد کی واپسی اور متاثرہ انفراسٹرکچر کی مرمت جیسے عوامل مستقبل میں تیل کی قیمتوں کے تعین میں اہم کردار ادا کریں گے۔
