عالمی منڈی میں تیل مہنگا، قیمتیں نئی بلند سطح پر پہنچ گئیں

معاشی ماہرین کا کہنا ہے کہ مشرقِ وسطیٰ میں ممکنہ کشیدگی اور سپلائی میں رکاوٹوں کے خدشات نے سرمایہ کاروں کو تشویش میں مبتلا کر دیا ہے۔

بین الاقوامی مارکیٹ میں برینٹ کروڈ آئل کی قیمت 3.4 فیصد اضافے کے بعد 96.50 ڈالر فی بیرل تک جا پہنچی، جبکہ امریکی خام تیل (ڈبلیو ٹی آئی) 3 فیصد اضافے کے ساتھ 93.75 ڈالر فی بیرل پر ٹریڈ ہوتا رہا۔

تجزیہ کاروں کے مطابق خطے میں غیر یقینی صورتحال کے باعث تیل کی طلب میں اضافہ دیکھنے میں آ رہا ہے، جس نے قیمتوں کو اوپر دھکیل دیا ہے۔

توانائی ماہرین کا کہنا ہے کہ ایران اور اسرائیل کے درمیان جاری کشیدگی اگر مزید شدت اختیار کرتی ہے تو تیل کی سپلائی متاثر ہونے کے خدشات بڑھ سکتے ہیں۔ یہی وجہ ہے کہ عالمی منڈی میں سرمایہ کار محفوظ سرمایہ کاری کی جانب متوجہ ہو رہے ہیں اور تیل کی خریداری میں اضافہ کر رہے ہیں۔

ماہرین کی جانب سے خبردار کیا گیا ہے کہ اگر مشرقِ وسطیٰ میں تنازع پھیلتا ہے تو نہ صرف تیل بلکہ عالمی معیشت بھی اس کے اثرات سے متاثر ہو سکتی ہے۔ تیل کی بڑھتی ہوئی قیمتیں دنیا بھر میں ایندھن، ٹرانسپورٹ اور اشیائے ضروریہ کی لاگت میں اضافے کا باعث بن سکتی ہیں۔

یہ بھی پڑھیں:ایران نے ایک بار پھر اسرائیل پر میزائل داغ دیے

اقتصادی حلقوں کے مطابق آنے والے دنوں میں خطے کی صورتحال عالمی تیل منڈی کی سمت کا تعین کرے گی اور قیمتوں میں مزید اتار چڑھاؤ کا امکان برقرار رہے گا۔