گھی اور کوکنگ آئل بھی مہنگا، شہری پریشان

رپورٹس کے مطابق فیصل آباد میں روٹی کی قیمت بڑھ کر 20 روپے تک پہنچ گئی ہے، جس سے شہریوں پر اضافی مالی بوجھ پڑ رہا ہے۔

شہریوں کا کہنا ہے کہ مسلسل بڑھتی مہنگائی کے باعث دو وقت کی روٹی کا انتظام بھی مشکل ہوتا جا رہا ہے، جبکہ گھریلو اخراجات پہلے کے مقابلے میں کئی گنا بڑھ چکے ہیں۔

کوکنگ آئل اور گھی کی قیمتوں میں بھی 10 سے 15 روپے فی لیٹر تک اضافہ ریکارڈ کیا گیا، قیمتوں میں اس اضافے نے نہ صرف گھریلو بجٹ کو متاثر کیا ہے بلکہ کم آمدن والے خاندانوں کیلئے خوراک کی بنیادی ضروریات پوری کرنا بھی ایک بڑا چیلنج بن گیا ہے۔

معاشی ماہرین کا کہنا ہے کہ اشیائے خورونوش کی قیمتوں میں مسلسل اضافہ مہنگائی کے دباؤ کو مزید بڑھا رہا ہے، جس کے اثرات سب سے زیادہ دیہاڑی دار مزدوروں اور محدود آمدن والے افراد پر پڑ رہے ہیں۔

شہریوں نے حکومت سے مطالبہ کیا ہے کہ بنیادی اشیائے ضروریہ کی قیمتوں کو قابو میں رکھنے کیلئے فوری اقدامات کیے جائیں، تاکہ عوام کو بڑھتی مہنگائی کے اثرات سے بچایا جا سکے۔

یہ بھی پڑھیں:آٹے کی قیمتوں میں بڑا اضافہ، مزدور طبقہ پریشان

دوسری جانب عوام کو خدشہ ہے کہ اگر قیمتوں میں اضافے کا یہی سلسلہ جاری رہا تو آنے والے دنوں میں مزید معاشی مشکلات پیدا ہو سکتی ہیں۔