دودھ اور دہی کی قیمتوں میں بڑا اضافہ، شہریوں کی مشکلات بڑھ گئیں
مقامی مارکیٹ ریٹس کے مطابق دودھ فروشوں کی جانب سے دودھ کی فی لٹر قیمت میں 30 روپے کا اضافہ کیا گیا ہے، جس کے بعد دودھ 220 روپے کے بجائے 250 روپے فی لٹر فروخت کیا جا رہا ہے۔
اسی طرح دہی کی قیمت میں بھی 40 روپے فی کلو اضافہ کر دیا گیا ہے اور اب دہی 240 روپے کے بجائے 280 روپے فی کلو دستیاب ہے۔
دودھ اور دہی کی نئی قیمتوں کا اعلان گوجر ملک سیلرز یونین اور فریش ملک یونین کی جانب سے مشترکہ طور پر کیا گیا ہے۔
یونین نمائندوں کا کہنا ہے کہ جانوروں کی خریداری، چارے، فیڈ اور دیگر اخراجات میں مسلسل اضافے کے باعث قیمتیں بڑھانا ناگزیر ہو چکا تھا، گزشتہ چند برسوں کے دوران بھینسوں کی قیمتوں میں غیر معمولی اضافہ دیکھنے میں آیا ہے۔
یونین کے مطابق تین سال قبل تقریباً ساڑھے 4 لاکھ روپے میں ملنے والی بھینس اب 15 لاکھ روپے تک پہنچ چکی ہے۔
یہ بھی پڑھیں: پندرہ سو روپے مالیت کے پرائز بانڈ کی قرعہ اندازی کی تاریخ کا اعلان
نمائندوں نے مزید بتایا کہ جانوروں کے چارے اور فیڈ کی قیمتوں میں بھی 700 فیصد تک اضافہ ریکارڈ کیا گیا ہے جبکہ ٹرانسپورٹ اخراجات بڑھنے سے دودھ کی سپلائی مزید مہنگی ہو گئی ہے۔
دوسری جانب ضلعی انتظامیہ نے مؤقف اختیار کیا ہے کہ دودھ اور دہی کی سرکاری قیمتیں تاحال برقرار ہیں اور سرکاری نرخوں سے زائد وصولی کی اجازت نہیں دی جائے گی۔
شہریوں نے دودھ اور دہی کی قیمتوں میں اضافے پر تشویش کا اظہار کرتے ہوئے مطالبہ کیا ہے کہ انتظامیہ مہنگائی پر قابو پانے کے لیے مؤثر اقدامات کرے تاکہ روزمرہ استعمال کی اشیاء عام آدمی کی پہنچ میں رہ سکیں۔
