تفصیلات کے مطابق کراچی کے مختلف علاقوں میں مائع گیس 350 فی کلو تک فروخت کی جا رہی ہے جبکہ نگران ادارے کی جانب سے مقرر کردہ سرکاری قیمت 219 روپے 68 پیسے فی کلو ہے، اس طرح شہریوں کو سرکاری نرخ سے کہیں زیادہ قیمت ادا کرنا پڑ رہی ہے۔
ادھر کوئٹہ اور بلوچستان کے دیگر علاقوں میں بھی گیس کی قیمتوں میں مسلسل اضافہ دیکھا جا رہا ہے، حالیہ دنوں میں فی کلو قیمت میں 70 روپے تک اضافہ ریکارڈ کیا گیا ہے جس کے بعد قیمت 260 روپے سے بڑھ کر 330 روپے فی کلو تک پہنچ گئی ہے۔
دوسری جانب پیٹرولیم مصنوعات مہنگی ہونے کے باعث بلوچستان کے مختلف علاقوں میں غیر قانونی طور پر ایران سے سمگل ہونے والے پیٹرول کی فروخت میں بھی اضافہ دیکھنے میں آ رہا ہے۔
حکام کا کہنا ہے کہ ذخیرہ اندوزی اور غیر قانونی کاروبار میں ملوث عناصر کیخلاف سخت کارروائی کی جائے گی۔
یہ بھی پڑھیں:پاکستان سمیت ایشیائی حصص بازاروں میں شدید مندی
تاجروں کے مطابق خطے میں جاری کشیدگی کے باعث مائع گیس کی فراہمی متاثر ہوئی ہے جس کے نتیجے میں مارکیٹ میں قلت پیدا ہو رہی ہے اور قیمتیں بڑھ رہی ہیں۔
ماہرین کا کہنا ہے کہ اگر سپلائی کی صورتحال بہتر نہ ہوئی تو آنے والے دنوں میں گیس کی قیمتوں میں مزید اضافہ بھی ہو سکتا ہے جس سے عوام کی مشکلات میں مزید اضافہ ہونے کا خدشہ ہے۔
