نیشنل الیکٹرک پاور ریگولیٹری اتھارٹی (نیپرا) میں بجلی کی قیمتوں میں اضافے سے متعلق درخواست پر سماعت مکمل ہو گئی، اتھارٹی درخواست پر فیصلہ اعدادوشمار کا جائزہ لینے کے بعد جاری کرے گی،سینٹرل پاور پرچیزنگ ایجنسی (سی پی پی اے ) نے فیول پرائس ایڈجسٹمنٹ کی مد میں بجلی کی قیمتوں میں اضافے کی درخواست تھی۔

سی پی پی اے حکام کے مطابق طلب پوری کرنے کے لئے دسمبر میں درآمدی گیس اور کوئلے والے پلانٹس چلائے گئے ، حکومت کے انکریمنٹل پیکیج کے باعث اضافہ آرہا ہے ، پہلے کہا تھا کہ انکریمنٹل پیکیج کے باعث مہنگے پلانٹس چلانا پڑیں گے۔

ممبر نیپرا مقصود انور نے ریمارکس میں کہا کہ سی پی پی اے نے کہا تھا کہ ایسا نہیں ہو گا، اس کا فرق سہ ماہی ایڈجسٹمنٹ میں ایڈجسٹ ہو جائے گا۔

یہ بھی پڑھیں: سولر صارفین کو غیر متوقع طور پر بھاری بجلی کے بل موصول

سی پی پی اے حکام نے جواب دیا کہ انکریمنٹل پیکیج کے فوائد بھی ہیں ، انکریمنٹل پیکیج سے 44 فیصد انڈسٹریل صارفین کو فائدہ ہوا، 39 فیصد زرعی صارفین نے استفادہ کیا ہے۔

ممبر نیپرا نے کہا کہ سولرائزیشن کے باعث دن کو بجلی کی طلب کم ہوجاتی ہے ، دن میں پیداوار بڑھانے کے لئے کوئی پیکیج لانا چاہئے جس پر سی پی پی اے حکام نے جواب دیا کہ اس حوالے سے کام کررہے جلد ریگولیٹر کے پاس درخواست لائیں گے۔

نیپرا کی جانب سے کہا کہ سٹیٹ آف انڈسٹری رپورٹ پر پاور ڈویژن نے ابھی تک تحریری طور پر کچھ نہیں بھجوایا۔

بعدازاں نیپرا نے بجلی کی قیمتوں میں اضافے سے متعلق سی پی پی اے کی درخواست پر فیصلہ محفوظ کر لیا۔