کاروبار کے دوران کے ایس ای 100 انڈیکس میں ایک اعشاریہ دو فیصد سے زائد اضافہ ریکارڈ کیا گیا، جس کے نتیجے میں انڈیکس 2 ہزار 137 پوائنٹس بڑھ کر 178 ہزار 500 پوائنٹس کے قریب پہنچ گیا۔

مارکیٹ ذرائع کے مطابق کاروبار کے آغاز سے ہی خریداری کا دباؤ غالب رہا، جس کے باعث بینکنگ، توانائی، سیمنٹ اور ٹیلی کمیونیکیشن سمیت مختلف شعبوں کے حصص میں نمایاں اضافہ دیکھا گیا۔ سرمایہ کاروں کی جانب سے بھرپور دلچسپی نے مارکیٹ کو نئی بلندیوں کی جانب دھکیل دیا۔

ماہرین کا کہنا ہے کہ معاشی اشاریوں میں بہتری، مہنگائی کی شرح میں کمی کی توقعات اور پالیسی استحکام سے متعلق مثبت اشاروں نے سرمایہ کاروں کے اعتماد کو تقویت دی۔

اس کے علاوہ نئے سال کے آغاز پر مارکیٹ میں آنے والی تازہ سرمایہ کاری نے بھی تیزی کے رجحان کو مضبوط کیا ہے۔

گزشتہ روز بھی پاکستان اسٹاک ایکسچینج میں نئے سال کے آغاز اور کاروباری ہفتے کے چوتھے دن شاندار تیزی دیکھی گئی تھی، جس کے باعث 100 انڈیکس میں نمایاں اضافہ ریکارڈ ہوا تھا، مسلسل دوسرے دن تیزی کے تسلسل نے سرمایہ کاروں کے حوصلے بلند کر دیے ہیں۔

یہ بھی پڑھیں:چکن کی قیمتوں میں ہوشربا اضافہ

تجزیہ کاروں کے مطابق اگر موجودہ معاشی اور سیاسی حالات میں استحکام برقرار رہا تو آئندہ دنوں میں اسٹاک مارکیٹ میں مزید بہتری کا امکان ہے۔

معاشی ماہرین کی جانب سے سرمایہ کاروں کو مشورہ دیا گیا ہے کہ وہ محتاط حکمت عملی کے ساتھ سرمایہ کاری کریں اور مارکیٹ کے اتار چڑھاؤ پر نظر رکھیں۔

مجموعی طور پر پاکستان اسٹاک ایکسچینج میں نئے سال کے ابتدائی دنوں میں آنے والی زبردست تیزی کو ملکی معیشت کیلئے ایک مثبت اشارہ قرار دیا جا رہا ہے، جو سرمایہ کاری کے ماحول میں اعتماد کی بحالی کا عندیہ دیتی ہے۔