وفاقی ادارہ شماریات نے ہفتہ وار بنیادوں پر مہنگائی سے متعلق تازہ رپورٹ جاری کردی۔

رپورٹ کے مطابق ملک میں ہفتہ وار مہنگائی کی شرح میں صفر اعشاریہ 24 فیصد کا اضافہ ہوا ہے جس سے ہفتہ وار مہنگائی کی سالانہ شرح 3.75 فیصد کی سطح پر آگئی ، ایک ہفتے کے دوران 17 اشیائے ضروریہ مہنگی جبکہ 14 کی قیمتوں میں کمی ریکارڈ کی گئی۔

ادارہ شماریات کی رپورٹ میں بتایا گیا کہ ایک ہفتے کے دوران مرغی 11.1 فیصد مہنگی ہو گئی ، گزشتہ ہفتے کے دوران مرغی کی قیمت میں 40 روپے 34 پیسے کا اضافہ ہو گیا ، ایک ہفتے میں مرچ پاؤڈر 3 فیصد اور انڈے 2.8 فیصد مہنگے ہو گئے۔

رپورٹ کے مطابق ایک ہفتے کے دوران انڈے 10 روپے 31 پیسے فی درجن مہنگے ہو گئے ، گزشتہ ہفتے میں جلانے کی لکڑی 12 روپے 35 پیسے فی من مہنگی ہوئی ، ایک ہفتے میں دال مونگ ایک روپیہ 17 پیسے مہنگی ہوئی جبکہ دہی، تازہ دودھ، مٹن اور بچوں کا خشک دودھ بھی مہنگی ہونے والی اشیاء میں شامل ہیں۔

یہ بھی پڑھیں: زندہ مرغی اور گوشت سستا، انڈے مہنگے

ادارہ شماریات کے مطابق ایک ہفتے میں ٹماٹر 9 روپے فی کلو سستے ہو گئے ، گزشتہ ہفتے کے دوران آلو 5 روپے فی کلو سستے ہوئے ، ایک ہفتے کے دوران چینی کی فی کلو قیمت میں 7 روپے 9 پیسے کمی ہوئی جبکہ گزشتہ ہفتے میں گڑ 2 روپے 49 پیسے فی کلو سستا ہوا۔

اسی طرح ایک ہفتے میں ڈیزل کی قیمت میں 14 روپے فی لیٹر تک کمی ریکارڈ کی گئی، دال مسور، کیلے اور ایل پی جی کا گھریلو سلنڈر بھی سستی ہونے والی اشیاء میں شامل ہیں۔

ادارہ شماریات کے رپورٹ کے مطابق گزشتہ ہفتے کے دوران ڈبل روٹی، گندم کا آٹا، کپڑے اور بجلی سمیت 20 اشیاء کی قیمتیں مستحکم رہیں ۔