آل پاکستان صرافہ جیمز اینڈ جیولرز ایسوسی ایشن کے کی جانب سے جاری کردہ رپورٹس کے مطابق مقامی مارکیٹ میں سونے اور چاندی کی قیمتیں تاریخ کی نئی بلند ترین سطح پر پہنچ گئی ہیں،جس کے بعد فی تولہ سونے کی قیمت میں 6 ہزار روپے کے اضافے سے قیمت  376700 روپے ہوگئی ہے۔

مزید برآں 10 گرام سونے کے بھاو 5144 روپے کے اضافے سے 322959 روپے ریکارڈ کئے گئے،جبکہ ملک میں فی تولہ چاندی بھی 12 روپے بڑھ کر 4315 روپے کی ریکارڈ سطح تک پہنچ گئی ہے۔

دوسری جانب انٹرنیشنل گولڈ مارکیٹ میں فی اونس سونا 60 ڈالر مہنگا ہوکر 3540 ڈالر کا ہوگیا ہے۔

یہ بھی پڑھیں:ایف بی آر نے آن لائن کاروبار کیلئے نئے قواعدوضوابط جاری کردیے

عالمی سطح پر سرمایہ کار غیر یقینی معاشی حالات اور کرنسی مارکیٹ کی غیر استحکام کے باعث سونے کو محفوظ سرمایہ کاری کے طور پر ترجیح دے رہے ہیں۔

معاشی ماہرین کے مطابق مقامی مارکیٹ میں ڈالر کے مقابلے میں روپے کی قدر میں کمی اور مہنگائی کے دباؤ نے بھی سونے کی قیمتوں میں اضافے کو تقویت دی ہے، اگر عالمی منڈی میں یہی رجحان برقرار رہا تو آنے والے دنوں میں سونے کی قیمتیں مزید بڑھ سکتی ہیں، جس کا براہ راست اثر عام خریدار اور زیورات کی صنعت پر پڑے گا۔