فوجی طیارہ گر کر تباہ، 19 افراد ہلاک ہوگئے
حادثے کے بعد طیارے میں آگ بھڑک اٹھی اور زمین سے ٹکراتے ہی زور دار دھماکا ہوا۔
روسی میڈیا رپورٹس کے مطابق یہ افسوسناک واقعہ روس کے سائبیریا کے علاقے کیمیروو میں پیش آیا، جہاں فوجی طیارہ An-12 دوران پرواز حادثے کا شکار ہوگیا۔ طیارے میں عملے سمیت مجموعی طور پر 19 افراد سوار تھے، جو حادثے میں جان کی بازی ہار گئے۔
عینی شاہدین کے مطابق طیارے کو فضا میں ہی آگ لگی ہوئی تھی اور وہ تیزی سے نیچے کی جانب آ رہا تھا، چند لمحوں بعد طیارہ زمین سے ٹکرایا تو ایک زور دار دھماکا ہوا اور اس میں آگ کے شعلے بلند ہوگئے۔
کیمیروو کے گورنر ایلیا سیریڈیوک نے سماجی رابطے کی ویب سائٹ ٹیلی گرام پر واقعے کی تصدیق کرتے ہوئے بتایا کہ ضلع یاگونوو میں فضائی حادثہ پیش آیا ہے۔
ان کا کہنا تھا کہ متعلقہ حکام موقع پر موجود ہیں اور متاثرہ علاقے میں ہر ممکن ضروری امداد فراہم کی جا رہی ہے۔
گورنر کے مطابق حادثے کی وجوہات جاننے کیلئے متعلقہ اداروں نے تحقیقات شروع کردی ہیں تاکہ معلوم کیا جاسکے کہ طیارہ کس وجہ سے گر کر تباہ ہوا۔
یہ بھی پڑھیں:ٹرمپ ایران کیساتھ طویل جنگ نہیں چاہتے، جے ڈی وینس
دوسری جانب روسی وزارت دفاع کی جانب سے تاحال حادثے اور اس میں ہونے والی ہلاکتوں کے حوالے سے کوئی باضابطہ بیان جاری نہیں کیا گیا۔