ایرانی حملوں نے امریکی فوجی اڈوں کو ہلا کر رکھ دیا، 274 عمارتیں تباہ
امریکی اخبار وال اسٹریٹ جرنل کی تحقیق کے مطابق ایرانی حملوں میں خطے کے 24 امریکی فوجی اڈوں کی 274 عمارتیں متاثر ہوئیں، جبکہ نقصانات کا ابتدائی تخمینہ اربوں ڈالر تک پہنچ گیا ہے۔
رپورٹ کے مطابق وال اسٹریٹ جرنل نے سیٹلائٹ تصاویر اور امریکی فوجی حکام کے انٹرویوز کی مدد سے ایرانی حملوں کے نتیجے میں ہونے والے نقصانات کا جائزہ لیا۔ تحقیق میں انکشاف کیا گیا کہ جنگ کے ابتدائی دو ہفتوں کے دوران ہی 119 عمارتیں متاثر ہوئی تھیں۔
امریکی اخبار کی تحقیق کے مطابق ایران نے جنگ کے پہلے چھ ماہ کے دوران مشرق وسطیٰ میں امریکی فوجی موجودگی والی 24 تنصیبات کو نشانہ بنایا، جس کے نتیجے میں مجموعی طور پر 274 عمارتوں کو نقصان پہنچا۔
رپورٹ میں بتایا گیا ہے کہ امریکی محکمہ دفاع نے ان حملوں سے ہونے والے نقصانات کا ابتدائی تخمینہ کم از کم 5 ارب ڈالر لگایا ہے۔ ایرانی حملوں میں فوجیوں کی رہائشی عمارتوں کو بھی نشانہ بنایا گیا، جس سے امریکی فوجی تنصیبات اور رہائشی سہولیات کو بڑے پیمانے پر نقصان پہنچا۔
وال اسٹریٹ جرنل کے مطابق امریکی فوجی اڈوں کی تعمیر نو پر 4 ارب ڈالر سے زائد اخراجات آنے کا امکان ہے، جبکہ مجموعی مالی نقصان کا تخمینہ 15 ارب ڈالر تک بھی پہنچنے کا ذکر کیا گیا ہے۔
رپورٹ میں مزید کہا گیا ہے کہ بھاری نقصانات کے بعد امریکا مشرق وسطیٰ میں اپنی فوجی موجودگی محدود کرنے کے آپشن پر بھی غور کر رہا ہے۔
