ایران جنگ میں امریکا سے بڑی غلطیاں ہوئیں: جے ڈی وینس
امریکی نیوز چینل کے ایک خصوصی عوامی پروگرام میں سوالات کے جواب دیتے ہوئے جے ڈی وینس نے کہا کہ ایران جنگ کے دوران بعض اہم معلومات ان تک نہیں پہنچ سکیں۔
انہوں نے فوجی تنصیبات کی سیکیورٹی کے حوالے سے موجود کمزوریوں کا ذکر کرتے ہوئے یقین دہانی کرائی کہ ہر ناکامی کا سنجیدگی سے جائزہ لیا جائے گا اور ضروری اصلاحات کی جائیں گی۔
امریکی نائب صدر نے تسلیم کیا کہ بعض مقامات پر فوجیوں کی تعیناتی کے فیصلے درست ثابت نہیں ہوئے، کچھ معاملات میں یہ احساس ہوا کہ فوجیوں کو مخصوص مقامات پر تعینات کرنا بڑی غلطی تھی، تاہم ان خامیوں کو دور کرنے کیلئے تبدیلیاں کی گئی ہیں۔
جے ڈی وینس نے کم قیمت ڈرونز سے پیدا ہونے والے بڑھتے ہوئے خطرات پر بھی تشویش ظاہر کی، ان کا کہنا تھا کہ امریکی فوج نے اپنے اہلکاروں کو بہتر تحفظ فراہم کرنے اور مزید جانی نقصان سے بچنے کیلئے اپنی حکمتِ عملی میں تبدیلیاں کی ہیں۔
دوسری جانب امریکی صدر ڈونلڈ ٹرمپ کی جانب سے جنگ کے آغاز میں ظاہر کی گئی توقعات کے باوجود فیصلہ کن فتح حاصل نہ ہونے سے متعلق سوال پر جے ڈی وینس نے امریکی مؤقف کا دفاع کیا۔
انہوں نے کہا کہ امریکا بعض پہلوؤں سے فیصلہ کن کامیابی حاصل کرچکا ہے، تاہم جنگ کا حتمی نتیجہ ایران کے اقدامات پر بھی منحصر ہے۔
یہ بھی پڑھیں:مذہبی اجتماع کے دوران بھگدڑ میں 19 افراد ہلاک ہوگئے
امریکی نائب صدر کے مطابق واشنگٹن کی کوشش ہے کہ ایران سے ایسی ٹھوس ضمانت حاصل کی جائے کہ وہ اپنے جوہری پروگرام کو دوبارہ بحال نہیں کرے گا۔
