سابق وزیرِ اعلیٰ ممتا بنرجی پر چاقو سے حملے کی کوشش
بھارتی میڈیا رپورٹس کے مطابق ممتا بنرجی کی جماعت نے الزام عائد کیا ہے کہ ایک خاتون نے منگل کی شام ان پر چاقو سے حملہ کرنے کی کوشش کی، تاہم پولیس نے اپنے بیان میں چاقو سے حملے کی کوشش کی تصدیق نہیں کی اور واقعے کو جھگڑے سے تعبیر کیا ہے۔
رپورٹس کے مطابق یہ واقعہ کولکتہ کے علاقے کالی گھاٹ میں ممتا بنرجی کی رہائش گاہ کے قریب شام تقریباً 6 بجے پیش آیا۔ اس وقت وہ ایک پوجا پنڈال کا افتتاح کرنے کیلئے گھر سے باہر نکل رہی تھیں کہ ان کا ایک خاتون سے سامنا ہوگیا۔
پولیس میں درج شکایت کے مطابق خاتون کی شناخت تنشٹھا ساہا کے نام سے کی گئی ہے۔ شکایت میں الزام لگایا گیا ہے کہ خاتون نے خود کو ممتا بنرجی کی بھتیجی ظاہر کیا، نازیبا زبان استعمال کی اور ان کی سیکیورٹی حصار میں داخل ہونے کی کوشش کی۔
شکایت میں مزید دعویٰ کیا گیا ہے کہ خاتون کے پاس چاقو بھی موجود تھا، تاہم حکام کی جانب سے تاحال اس دعوے کی آزادانہ تصدیق سامنے نہیں آئی۔
پولیس حکام کے مطابق ممتا بنرجی کے گھر سے نکلنے کے وقت خاتون سے ان کا سامنا ہوا، جس کے بعد دونوں کے درمیان تلخ کلامی ہوئی، پولیس نے خاتون کو حراست میں لے لیا ہے اور واقعے کے مختلف پہلوؤں کا جائزہ لیا جا رہا ہے۔
تحقیقات کے دوران پولیس خاتون سے پوچھ گچھ کرنے کے ساتھ جائے وقوعہ کی ویڈیو فوٹیج بھی دیکھ رہی ہے تاکہ واقعے کی اصل صورت حال، تنازعے کی وجہ اور مبینہ حملے سے متعلق دعوؤں کی حقیقت معلوم کی جا سکے۔
واضح رہے کہ چاقو سے حملے کی کوشش کا دعویٰ تاحال پارٹی کی شکایت تک محدود ہے، جبکہ پولیس کی جانب سے اس کی تصدیق نہیں کی گئی۔ واقعے کی تحقیقات جاری ہیں۔
