ایران نے ایک اور امریکی ڈرون مار گرانے کا اعلان کردیا
ایرانی حکام کے مطابق کارروائی آبنائے ہرمز کے قریب کی گئی، جہاں خطے میں بڑھتی ہوئی کشیدگی کے باعث فوجی سرگرمیاں جاری ہیں۔
ایرانی سرکاری خبر رساں ادارے کے مطابق پاسداران انقلاب کی ایرو اسپیس فورس نے آبنائے ہرمز کے قریب ایک امریکی ڈرون کو جدید فضائی دفاعی نظام کے ذریعے نشانہ بنایا، فضائی دفاعی نظام نے ڈرون کو روکا اور اسے تباہ کردیا۔ ایرانی بیان میں ڈرون کو امریکی قرار دیتے ہوئے کہا گیا کہ واقعہ آبنائے ہرمز کے اوپر پیش آیا۔
ایرانی حکام کی جانب سے کارروائی کے حوالے سے مزید تفصیلات، ڈرون کے مشن یا اس کے ملبے سے متعلق معلومات فوری طور پر سامنے نہیں آئیں۔
دوسری جانب دستیاب معلومات کے مطابق امریکا کی جانب سے تاحال ایرانی دعوے کی آزادانہ طور پر تصدیق نہیں کی گئی۔ اس لیے ڈرون گرائے جانے سے متعلق ایرانی بیان کو فی الحال دعوے کے طور پر ہی دیکھا جا رہا ہے۔
واضح رہے کہ آبنائے ہرمز دنیا کے اہم ترین بحری راستوں میں شمار ہوتی ہے اور خلیج فارس سے عالمی منڈیوں تک توانائی کی ترسیل میں اس کی اہمیت نمایاں ہے۔
یہ بھی پڑھیں:مسجد الحرام کے مؤذن شیخ ابراہیم المدنی انتقال کر گئے
یہ واقعہ ایسے وقت میں سامنے آیا ہے جب ایران اور امریکا کے درمیان کشیدگی برقرار ہے، آبنائے ہرمز کے اطراف بڑھتی ہوئی فوجی سرگرمیوں کے باعث خطے کی صورتحال پر عالمی سطح پر بھی نظر رکھی جا رہی ہے۔
