مسجد الحرام کے مؤذن شیخ ابراہیم المدنی انتقال کر گئے
ان کے انتقال کی خبر کے بعد حرمین شریفین سے وابستہ افراد اور ان کے چاہنے والوں کی جانب سے گہرے دکھ اور افسوس کا اظہار کیا جا رہا ہے۔
سعودی میڈیا کے مطابق شیخ ابراہیم المدنی مسجد الحرام کی مکبریہ سے وابستہ 24 بنیادی مؤذنین میں شامل تھے۔ ان مؤذنین میں سے 6 روزانہ پانچوں نمازوں اور فجر کی پہلی اذان کیلئے باری باری خدمات انجام دیتے ہیں۔ شیخ ابراہیم المدنی بالخصوص فجر کی اذان، تکبیرات اور امام کے پیچھے تکبیرات کی تبلیغ کے حوالے سے معروف تھے۔
حرمین شریفین کے سرکاری ادارے کی ویب سائٹ پر بھی شیخ ابراہیم بن عادل المدنی کا نام مسجد الحرام کے مؤذنین کی فہرست میں شامل ہے۔
شیخ ابراہیم المدنی نے ایک سابق گفتگو میں مسجد الحرام میں اپنی پہلی اذان کا واقعہ بھی بیان کیا تھا۔ انہوں نے بتایا تھا کہ کعبہ شریف کے گرد طواف کرنے والے افراد کو اپنی آواز میں اذان سنتے دیکھ کر وہ جذباتی ہوگئے تھے۔
ان کی وفات کی خبر کے بعد سماجی رابطوں کی ویب سائٹس پر ان کی اذان اور تکبیرات کی ویڈیوز اور آڈیو ریکارڈنگز بھی شیئر کی جارہی ہیں، جبکہ ان کے نام سے متعلق پیغامات بھی گردش کر رہے ہیں۔
یہ بھی پڑھیں:خوفناک ٹریفک حادثے میں ایک ہی خاندان کے 7 افراد جاں بحق
شیخ ابراہیم المدنی کی وفات پر ان کے چاہنے والوں اور حرمین سے وابستہ افراد نے رنج و غم کا اظہار کرتے ہوئے مرحوم کیلئے دعائے مغفرت کی ہے۔
