ریاض:خوفناک ٹریفک حادثے میں ایک ہی خاندان کے 7 افراد جاں بحق
سعودی میڈیا کے مطابق افسوسناک حادثہ العیون العقیر روڈ پر پیش آیا، جہاں دو گاڑیاں اچانک ایک دوسرے سے ٹکرا گئیں، حادثہ اتنا شدید تھا کہ گاڑیوں میں سوار تمام افراد جان کی بازی ہار گئے۔
رپورٹس کے مطابق جاں بحق ہونے والے 9 افراد میں سے 7 کا تعلق ایک ہی خاندان سے تھا۔ جاں بحق افراد میں والدین، 3 بیٹے اور 2 بیٹیاں شامل ہیں، جبکہ دوسری گاڑی میں سوار 2 نوجوان بھی حادثے میں جان بحق ہوگئے۔
مشرقی صوبے کے محکمہ ٹریفک کے مطابق حادثے کی اطلاع ملتے ہی امدادی ٹیموں نے موقع پر پہنچ کر کارروائی شروع کردی۔ ابتدائی تحقیقات کے مطابق حادثہ ایک گاڑی کے اچانک مڑنے یا سمت تبدیل کرنے کے باعث پیش آیا۔
حادثے کے بعد سول ڈیفنس اور ہلال احمر کی خصوصی ریسکیو ٹیمیں بھی موقع پر پہنچیں۔ امدادی اہلکاروں نے تباہ شدہ گاڑیوں میں پھنسے افراد کو نکالنے کیلئے کارروائی کی، تاہم تمام متاثرین جانبر نہ ہوسکے۔
متعلقہ حکام کی جانب سے حادثے کے حوالے سے ضروری قانونی اور انتظامی کارروائی مکمل کی جا رہی ہے۔
یہ بھی پڑھیں:ماسکو پر یوکرین کا اب تک کا سب سے بڑا ڈرون حملہ
واضح رہے کہ العقیر العیون روڈ مشرقی صوبے کی اہم شاہراہوں میں شمار ہوتی ہے، جو الاحسا گورنریٹ کے مختلف علاقوں کو ساحلی علاقوں سے ملاتی ہے۔
