زہریلا مشروب پینے سے 48 افراد جان سے ہاتھ گنوا بیٹھے
واقعے کے بعد پولیس نے کارروائی کرتے ہوئے مشروب کی تیاری اور تقسیم سے مبینہ تعلق کے شبے میں 15 افراد کو گرفتار کرلیا۔
زہریلے مشروب سے متاثر ہونے والے افراد کا تعلق اوڈگبو اور آئریل کے علاقوں سے ہے، جہاں مشروب پینے کے بعد متعدد افراد کی حالت اچانک خراب ہوئی۔ متاثرین میں بعض افراد کو بینائی متاثر ہونے، سانس لینے میں دشواری اور بے ہوشی جیسی سنگین علامات کا سامنا کرنا پڑا۔
ابتدائی تحقیقات میں مشروب کے اندر میتھانول کی موجودگی کا شبہ ظاہر کیا گیا ہے۔ حکام کا کہنا ہے کہ مشروب کے نمونے حاصل کرکے مزید تحقیقات کی جا رہی ہیں تاکہ زہریلے مادے کی موجودگی اور اس کے ماخذ کا تعین کیا جاسکے۔
پولیس نے واقعے کی تحقیقات کا دائرہ وسیع کرتے ہوئے مشروب کی تیاری اور تقسیم میں ملوث ممکنہ افراد سے تفتیش شروع کردی ہے۔ گرفتار کیے گئے 15 افراد سے بھی پوچھ گچھ جاری ہے۔
دوسری جانب ہلاکتوں کی تعداد کے حوالے سے مختلف تازہ رپورٹس سامنے آئی ہیں، جن میں 48 یا 49 اموات کا ذکر کیا گیا ہے، متاثرین کی تعداد کی حتمی تصدیق اور شناخت کا عمل جاری ہے۔
یہ بھی پڑھیں:سویڈن کے وزیراعظم مستعفی ہوگئے
واضح رہے کہ میتھانول انتہائی زہریلا کیمیکل ہے جو انسانی جسم میں داخل ہونے کے بعد بینائی متاثر کرنے، اہم اعضا کو نقصان پہنچانے اور شدید صورت میں موت کا سبب بن سکتا ہے۔
