ہیلی کاپٹر گر کر تباہ، 3 افراد ہلاک جبکہ 4 گاڑیاں متاثر
غیر ملکی میڈیا کے مطابق ہیلی کاپٹر حادثہ سان فرنینڈو کے علاقے میں پیش آیا، جہاں اس سے کچھ فاصلے پر ایک گاڑی اور بس کے درمیان ٹکر کا واقعہ بھی پیش آیا تھا، حادثے کے وقت صحافی اس واقعے کی کوریج میں مصروف تھے۔
رپورٹس کے مطابق گاڑی اور بس کے تصادم میں 2 افراد ہلاک جبکہ 6 زخمی ہوئے، اسی دوران حادثے کے مقام سے تقریباً ڈیڑھ میل دور ایک خبر رساں ادارے کا ہیلی کاپٹر بھی گر کر تباہ ہوگیا۔
حکام کے مطابق ہیلی کاپٹر میں سوار تینوں افراد حادثے میں جان کی بازی ہار گئے، ہیلی کاپٹر کے زمین پر گرنے کے بعد اس میں آگ بھڑک اٹھی، جس نے قریب موجود 4 گاڑیوں کو بھی اپنی لپیٹ میں لے لیا۔ فائر فائٹرز نے موقع پر پہنچ کر آگ پر قابو پالیا۔
امریکی حکام کا کہنا ہے کہ فی الحال حادثے کی اصل وجہ معلوم نہیں ہوسکی، تاہم واقعے کی مکمل تحقیقات جاری ہیں۔ متعلقہ ادارے جائے حادثہ سے شواہد اکٹھے کررہے ہیں تاکہ یہ معلوم کیا جاسکے کہ ہیلی کاپٹر کس وجہ سے حادثے کا شکار ہوا۔
یہ بھی پڑھیں:طیارہ گر کر تباہ، تمام سوار افراد ہلاک
حکام کے مطابق حادثے کی تحقیقات مکمل ہونے کے بعد مزید تفصیلات سامنے آنے کا امکان ہے، واقعے نے علاقے میں موجود افراد میں خوف و تشویش پیدا کردی، جبکہ امدادی کارروائیوں کے دوران متاثرہ مقام کو بھی محفوظ بنایا گیا۔
