پیٹرول کی قیمتوں میں اضافے کیخلاف عوام سڑکوں پر نکل آئی
مظاہرین نے حکومت کی جانب سے پیٹرولیم مصنوعات کی قیمتوں میں اضافے پر شدید غم و غصے کا اظہار کیا۔ احتجاج کے دوران مختلف مقامات پر ٹائر جلائے گئے جبکہ اہم شاہراہوں کو کئی گھنٹوں تک ٹریفک کیلئے بند رکھا گیا، جس کے باعث شہریوں کو مشکلات کا سامنا کرنا پڑا۔
مظاہرین کا کہنا ہے کہ مہنگائی پہلے ہی عوام کی مشکلات میں اضافہ کر رہی ہے، ایسے میں پیٹرول اور ڈیزل کی قیمتوں میں مزید اضافہ عام شہریوں کیلئے ناقابل برداشت ہے۔
انہوں نے حکومت سے مطالبہ کیا کہ پیٹرولیم مصنوعات کی قیمتوں میں کیا گیا حالیہ اضافہ فوری طور پر واپس لیا جائے اور قیمتوں میں کمی کی جائے۔
واضح رہے کہ شامی حکومت نے آج ہی پیٹرول کی قیمت میں 30 فیصد جبکہ ڈیزل کی قیمت میں 40 فیصد اضافے کا باضابطہ اعلان کیا تھا، حکومتی فیصلے کے فوری بعد ملک کے مختلف علاقوں میں عوامی سطح پر شدید ردعمل سامنے آیا۔
قیمتوں میں اضافے کے بعد نہ صرف شہریوں میں تشویش پائی جا رہی ہے بلکہ احتجاج کا سلسلہ بھی شروع ہوگیا ہے۔ مظاہرین کا مؤقف ہے کہ ایندھن کی قیمتیں بڑھنے سے روزمرہ استعمال کی اشیا، سفری اخراجات اور دیگر بنیادی ضروریات کی قیمتوں پر بھی براہ راست اثر پڑے گا۔
یہ بھی پڑھیں:ایران میں تباہ امریکی طیارے کے پائلٹ کی ریسکیو ویڈیو 5 ماہ بعد جاری
شام میں جاری احتجاج نے حکومت کیلئے ایک نیا چیلنج پیدا کردیا ہے، جبکہ شہری قیمتوں میں اضافے کا فیصلہ واپس لینے کے مطالبے پر قائم ہیں۔
