تبت میں 5.3 شدت کا زلزلہ، شہری گھروں سے باہر نکل آئے
خبر ایجنسی کے مطابق تبت میں آنے والے زلزلے کی شدت ریکٹر اسکیل پر 5.3 ریکارڈ کی گئی، جبکہ زلزلے کی گہرائی 35 کلومیٹر بتائی گئی ہے۔
زلزلے کے جھٹکے محسوس ہونے کے بعد مختلف علاقوں میں شہریوں میں تشویش پھیل گئی اور لوگ اپنی جانیں محفوظ رکھنے کیلئے کھلی جگہوں کی جانب نکل آئے۔
ابتدائی اطلاعات کے مطابق زلزلے کے نتیجے میں فوری طور پر کسی جانی یا مالی نقصان کی اطلاع موصول نہیں ہوئی، حکام کی جانب سے صورتحال کا جائزہ لیا جا رہا ہے جبکہ مزید تفصیلات سامنے آنے کا انتظار ہے۔
تبت میں زلزلے کے تازہ جھٹکے ایسے وقت میں محسوس کیے گئے ہیں جب یہ خطہ چند روز قبل ہی ایک بڑی قدرتی آفت سے متاثر ہوا تھا۔ 26 اگست کو گلیشیئر ٹوٹنے کے بعد آنے والے سیلاب اور ملبے کے ریلے نے تبت اور نیپال کے سرحدی علاقوں میں بڑے پیمانے پر تباہی مچائی تھی۔
قدرتی آفت کے نتیجے میں نیپال کے مختلف علاقوں میں صورتحال زیادہ سنگین رہی، جہاں سیلابی ریلے نے مکانات، سڑکوں، پلوں اور ہائیڈرو پاور منصوبوں کو شدید نقصان پہنچایا، جبکہ بڑی تعداد میں افراد کے لاپتا ہونے کی اطلاعات بھی سامنے آئی تھیں۔
یہ بھی پڑھیں:ایران نے امریکی جدید ترین بغیر پائلٹ آبدوز پکڑ لی
تازہ زلزلے کے بعد مقامی حکام کی جانب سے کسی ممکنہ آفٹر شاک اور مزید نقصانات کے خدشے کے پیش نظر صورتحال پر نظر رکھی جا رہی ہے۔
