کوالالمپور میں 61ویں ڈی جی سی اے اے کانفرنس کا انعقاد، پاکستانی وفد کی شرکت
کانفرنس کے دوران ڈی جی سول ایوی ایشن اتھارٹی نادر شفیع ڈار نے ایوی ایشن کے شعبے سے متعلق اپنی ماہرانہ رائے اور تجربات کا اظہار کیا۔ اس موقع پر پاکستانی سول ایوی ایشن کے تجربے اور خدمات کو بھی سراہا گیا۔
61ویں ڈی جی سی اے اے کانفرنس میں ’’اسمارٹ اسکائیز: پائیدار اور مؤثر ایوی ایشن کے لیے ابھرتی ہوئی ٹیکنالوجیز‘‘ کے موضوع پر بھی خصوصی گفتگو اور تبادلہ خیال کیا جا رہا ہے۔
ڈی جی سول ایوی ایشن اتھارٹی نادر شفیع ڈار نے ’’اسمارٹ اسکائیز‘‘ کے موضوع پر ہونے والی اعلیٰ سطحی پینل بحث میں بطور پینلسٹ شرکت کی، جہاں ایوی ایشن کے مستقبل، جدید ٹیکنالوجی اور پائیدار فضائی سفر سے متعلق امور زیرِ بحث آئے۔
یہ بھی پڑھیں: پی آئی اے میں اصلاحات کا عمل تیز کردیا گیا
اس موقع پر نادر شفیع ڈار نے کہا کہ پاکستان سول ایوی ایشن ہوابازی کے شعبے کے فروغ کے لیے اپنا کردار ادا کر رہا ہے اور ریگولیٹری معاملات میں کسی قسم کا سمجھوتہ نہیں کیا جائے گا۔
.jpeg)
انہوں نے کہا کہ فلائٹ سیفٹی ایوی ایشن کے شعبے کے لیے انتہائی اہم ہے، جبکہ ایئرلائنز کو سیفٹی مینجمنٹ سسٹم لازمی طور پر اپنانا چاہیے تاکہ فضائی سفر کے حفاظتی معیار کو مزید بہتر بنایا جا سکے۔
کانفرنس کے مختلف سیشنز میں ایوی ایشن کے شعبے کو درپیش ریگولیٹری چیلنجز کا بھی جائزہ لیا جا رہا ہے، جبکہ تکنیکی ایوی ایشن سیفٹی کے موضوع پر ہونے والے سیشن میں ڈی جی سول ایوی ایشن اتھارٹی نادر شفیع ڈار بطور ماڈریٹر بھی فرائض انجام دیں گے۔
کانفرنس میں مختلف ممالک کے ایوی ایشن ماہرین اور حکام کی شرکت کے دوران عالمی ہوابازی کے شعبے میں جدید ٹیکنالوجیز، سیفٹی، ریگولیشن اور پائیدار ترقی سے متعلق اہم امور پر تبادلہ خیال جاری ہے۔
