ایران نے ایک بار پھر آبنائے ہرمز بند کر دی
پاسدارانِ انقلاب کی جانب سے جاری بیان میں کہا گیا ہے کہ آبنائے ہرمز میں ایک ایسے بحری جہاز کو نشانہ بنایا گیا جس نے مبینہ طور پر اپنی شناخت اور ٹریکنگ سسٹم بند کر رکھا تھا اور مقررہ بحری راستے سے ہٹ گیا تھا۔
بیان کے مطابق پہلے مذکورہ جہاز کو انتباہی فائرنگ کے ذریعے روکنے کی کوشش کی گئی، تاہم مبینہ طور پر ہدایات پر عمل نہ ہونے کے بعد اس پر کروز میزائل داغا گیا، جس سے جہاز کے انجن روم کو نقصان پہنچا۔
ایرانی دعوے کے مطابق واقعے کے بعد عملے کے چند ارکان کے لاپتہ ہونے کی اطلاعات بھی موصول ہوئی ہیں، تاہم اس کی آزادانہ تصدیق نہیں ہو سکی۔
پاسدارانِ انقلاب نے مزید دعویٰ کیا کہ امریکہ کی مبینہ جارحیت کا بھرپور جواب دیا جائے گا اور خطے میں موجود نئے فوجی اڈوں کو بھی نشانہ بنایا جا سکتا ہے۔
واضح رہے کہ آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں سے عالمی سطح پر تیل اور گیس کی بڑی مقدار سمندری راستے کے ذریعے منتقل کی جاتی ہے۔ اس لیے اس آبی گزرگاہ سے متعلق کسی بھی پیش رفت پر عالمی منڈیاں اور بین الاقوامی برادری گہری نظر رکھتی ہیں۔
یہ بھی پڑھیں:ایران کا اُردن میں امریکی فوجی اڈے کو تباہ کرنے کا دعویٰ
تاحال ایران کے ان دعوؤں کی آزاد ذرائع سے تصدیق نہیں ہوئی، جبکہ صورتحال مسلسل تبدیل ہو رہی ہے اور مزید سرکاری بیانات سامنے آنے کا امکان ہے۔
