پاسداران انقلاب کا سپریم لیڈر کی شہادت کا بدلہ لینے کے عزم کا اظہار
سربراہ پاسداران انقلاب بریگیڈیئر جنرل احمد واحدی نے سابق سپریم لیڈر آیت اللّٰہ علی خامنہ ای کی شہادت کا بدلہ لینے کے عزم کا اظہار کرتے ہوئے امریکہ اور اسرائیل کو سخت نتائج کی وارننگ دی ہے۔
اپنے ایک بیان میں جنرل احمد واحدی کا کہنا تھا کہ آیت اللہ علی خامنہ ای کے قتل کا واقعہ تاریخ کی یادداشت سے کبھی مٹایا نہیں جا سکے گا، انصاف کی مکمل فراہمی اور ذمے دار عناصر، خصوصاً بچوں کی قاتل امریکی فوج کو مناسب سزا دینا ناگزیر ہے۔
جنرل واحدی نے کہا کہ امریکا سمیت تمام دشمن یہ ذہن نشین کر لیں کہ اس بزدلانہ قتل کے ذریعے وہ مزاحمت کے پرچم کو ہرگز سرنگوں نہیں کر سکتے، شہداء کے خون کا بدلہ لینا اور اس کے ذمے داروں کو قرار واقعی سزا دینا ایران کا حتمی، جائز اور ناقابلِ فراموش مطالبہ رہے گا۔
یہ بھی پڑھیں: شہید ایرانی سپریم لیڈر سید علی خامنہ ای کی نماز جنازہ ادا
خیال رہے کہ ایران کے شہید رہبر اعلیٰ سید آیت اللہ علی خامنہ ای کی حضرت امام رضا کے روضے کے احاطے میں گزشتہ شب تدفین کی گئی، ان کی آخری رسومات میں تقریباً 4 کروڑ 30 لاکھ افراد شریک ہوئے جن میں مختلف ممالک کے سربراہان، اعلیٰ عہدیدار اور مذہبی وفود بھی شامل تھے۔
