سعودی عرب میں آرامکو کا ہیلی کاپٹر گر کر تباہ، 14 افراد جاں بحق
سعودی وزارت توانائی کی جانب سے جاری بیان کے مطابق حادثہ راس تنورہ کے علاقے میں پیش آیا جہاں آرامکو کے زیر استعمال ہیلی کاپٹر کو دوران پرواز حادثہ پیش آیا۔
سعودی وزارت توانائی نے تصدیق کی ہے کہ ہیلی کاپٹر میں موجود تمام 14 افراد جان کی بازی ہار گئے، جاں بحق ہونے والے تمام افراد سعودی شہری تھے۔
وزارت توانائی کے مطابق حادثے کے بعد متعلقہ اداروں کو فوری طور پر صورتحال سے آگاہ کیا گیا جبکہ واقعے سے متعلق ابتدائی معلومات جمع کی جا رہی ہیں۔
حکام کا کہنا ہے کہ ہیلی کاپٹر حادثے کی وجوہات فوری طور پر سامنے نہیں آ سکیں تاہم متعلقہ اداروں کی جانب سے واقعے کی تحقیقات کی جائیں گی تاکہ حادثے کے اصل محرکات کا تعین کیا جا سکے۔
سعودی حکام نے حادثے میں جاں بحق افراد کے اہل خانہ سے گہرے دکھ اور افسوس کا اظہار کیا ہے۔
وزارت توانائی کا کہنا ہے کہ واقعے سے متعلق مزید تفصیلات تحقیقات مکمل ہونے کے بعد جاری کی جائیں گی۔
یہ بھی پڑھیں: اسرائیلی صدر کو لیجانے والا ہیلی کاپٹر حادثے کا شکار
حادثے کے بعد سعودی عرب میں صنعتی اور فضائی سیفٹی اقدامات کے حوالے سے بھی توجہ بڑھ گئی ہے جبکہ متعلقہ ادارے ہیلی کاپٹر کی پرواز، تکنیکی صورتحال اور حادثے کے مقام سے حاصل شواہد کا جائزہ لیں گے۔
واضح رہے کہ راس تنورہ سعودی عرب کا اہم صنعتی اور تیل بردار علاقہ سمجھا جاتا ہے جہاں آرامکو کی متعدد تنصیبات موجود ہیں۔
خیال رہے کہ آرامکو سعودی عرب کی سب سے بڑی آئل کمپنی ہے اور توانائی کے شعبے میں عالمی سطح پر اہم مقام رکھتی ہے اسی وجہ سے اس حادثے کو انتہائی افسوسناک اور اہم قرار دیا جا رہا ہے۔
