نئے عمرہ سیزن کے لیے درخواستوں کا آغاز ہوگیا
وزارتِ حج و عمرہ کے مطابق آج 31 مئی سے نئے عمرہ سیزن کے ویزے جاری کیے جا رہے ہیں جبکہ بین الاقوامی زائرین کی آمد بھی اسی تاریخ سے شروع ہو جائے گی۔
سعودی حکام کے مطابق رواں سال حج کی تکمیل کے فوراً بعد 1448 ہجری کے عمرہ سیزن کی تیاریوں کا آغاز کر دیا گیا،عمرہ ویزوں کا اجراء اور بیرونِ ملک سے آنے والے زائرین کی آمد 23 مارچ 2027 تک جاری رہے گی، جس سے لاکھوں مسلمانوں کو عمرہ کی سعادت حاصل کرنے کا موقع ملے گا۔
وزارتِ حج و عمرہ کی جانب سے وضاحت کی گئی ہے کہ زائرین اب سعودی حکومت کی نسک ایپلی کیشن کے ذریعے مکہ مکرمہ میں داخلے اور عمرہ پرمٹ حاصل کر سکیں گے۔
واضح رہے کہ یہ جدید ڈیجیٹل پلیٹ فارم پرمٹ، بکنگ اور دیگر حج و عمرہ خدمات کیلئے ایک مرکزی نظام کے طور پر کام کرتا ہے، جس سے زائرین کو سہولت اور شفافیت فراہم کی جا رہی ہے۔
یہ بھی پڑھیں:اگلے حج کے انتظامات فوری شروع کرنیکا عندیہ
رپورٹس کے مطابق عمرہ ویزے جاری کرنے کی آخری تاریخ 9 مارچ 2027 مقرر کی گئی ہے، جبکہ سعودی عرب میں داخلے کی آخری تاریخ 23 مارچ 2027 ہوگی، تمام عمرہ زائرین کو ہدایت کی گئی ہے کہ وہ 7 اپریل 2027 تک مملکت سے روانہ ہو جائیں۔
