سعودی عرب: اگلے حج کے انتظامات فوری شروع کرنیکا عندیہ
تفصیلات کے مطابق سعودی وزارت حج و عمرہ کے زیر اہتمام بعد از حج ’’ختامہ مسک‘‘ کانفرنس کا انعقاد کیا گیا، جس میں پاکستان کی نمائندگی وفاقی وزیر مذہبی امور سردار محمد یوسف نے کی۔ کانفرنس میں سیکرٹری مذہبی امور اور ڈی جی حج بھی شریک ہوئے۔
اس موقع پر وفاقی وزیر مذہبی امور سردار محمد یوسف نے سعودی ہم منصب ڈاکٹر توفیق بن فوزان الربیعہ سمیت مختلف غیر ملکی وفود سے ملاقاتیں کیں، جن میں حج انتظامات، عازمین کو فراہم کی جانے والی سہولیات اور آئندہ حج کے حوالے سے مختلف امور پر تبادلہ خیال کیا گیا۔
عالمی کانفرنس میں پاکستانی حج انتظامات کو بھرپور پذیرائی حاصل ہوئی۔ شرکا نے پاکستانی حجاج کے لیے کیے گئے انتظامات اور وزارت مذہبی امور کی کارکردگی کو سراہا۔
سعودی وزیر حج و عمرہ کی جانب سے اگلے حج انتظامات فوری شروع کرنے کے عندیے کو عازمین حج کے لیے بہتر سہولیات، بروقت منصوبہ بندی اور انتظامی امور میں مزید بہتری کی جانب اہم قدم قرار دیا جا رہا ہے۔
یہ بھی پڑھیں: عیدالاضحی: ملک بھر میں 74 لاکھ 70 ہزار جانور قربان
دوسری جانب وزارت مذہبی امور نے بعد از حج آپریشن کی تیاریاں مکمل کرلیں۔ حاجیوں کی وطن واپسی کے لیے سعودی عرب سے پروازوں کا آغاز کل 31 مئی کو ہوگا۔ پہلی پرواز سے 391 حاجی وطن واپس پہنچیں گے۔
وزارتِ مذہبی امور کے مطابق پہلی حج پرواز یکم جون کو صبح سیالکوٹ پہنچے گی۔ یکم جون کو 22 پروازیں حاجیوں کو لے کر پاکستان پہنچیں گی۔ ان پروازوں سے 5237 حجاج وطن پہنچیں گے۔ حج آپریشن کے پہلے روز پانچ پروازیں حاجیوں کو لے کر اسلام آباد آئیں گی۔
انہوں نے کہا کہ کراچی اور لاہور پہلے روز 4، 4 پروازیں حجاج کو واپس لائیں گی۔ پہلے روز ملتان اور سیال کوٹ تین، تین، فیصل آباد دو اورکوئٹہ ایک پرواز پہنچے گی۔ بعد از حج آپریشن کی آخری پرواز 30 جون کو لاہور پہنچنے پر حج آپریشن 2026 مکمل ہو جائے گا۔
وزارت مذہبی امور نے کہا کہ مدینہ سے بعد از حج آپریشن کی پروازیں 3 جون سے شروع ہونگی۔ بعد از حج فلائٹ آپریشن ایک ماہ تک جاری رہے گا۔ سرکاری سکیم کے ایک لاکھ 19 ہزار حاجیوں کو وطن واپس لایا جائے گا۔ سرکاری حج سکیم کے تحت 471 پروازوں کے ذریعے حاجیوں کو وطن واپس لایا جائے گا۔ پی آئی اے، ایئر سیال، ایئر بلو اور سعودی ایئر لائن بعد از حج آپریشن میں حصہ لیں گی۔
