اس سال کتنے عازمینِ حج سعودی عرب پہنچے ہیں؟ جانیے
تازہ ترین اعداد و شمار کے مطابق حج کی ادائیگی کیلئے سعودی عرب پہنچنے والے عازمین کی تعداد 15 لاکھ 18 ہزار تک پہنچ گئی، جن کیلئے سہولیات اور سیکیورٹی انتظامات مزید مؤثر بنائے جا رہے ہیں۔
مکہ میں حج سیکیورٹی فورسز کے کمانڈرز کی جانب سے پریس کانفرنس کے دوران بتایا گیا کہ مختلف ممالک سے آنے والے لاکھوں عازمین حج کی ادائیگی کیلئے سعودی عرب پہنچ چکے ہیں، عازمین کی بڑی تعداد کو سہولت فراہم کرنے کیلئے جدید ٹیکنالوجی اور ڈیجیٹل نظام کا استعمال کیا جا رہا ہے۔
انہوں نے مزید بتایا کہ تقریباً 30 فیصد عازمین مکہ روٹ انیشی ایٹو کے ذریعے سعودی عرب پہنچے، جس کا مقصد امیگریشن اور سفری مراحل کو آسان اور تیز بنانا ہے۔
دوسری جانب ذی الحجہ کے پہلے جمعے کے موقع پر لاکھوں زائرین نے مسجد الحرام میں نماز جمعہ ادا کی، اس موقع پر روحانی ماحول دیکھنے میں آیا اور عبادت گزاروں کی بڑی تعداد نے خصوصی دعاؤں کا اہتمام کیا۔
رپورٹس کے مطابق امام کعبہ شیخ ماہر المعیقلی نے اپنے خطبے میں ذی الحجہ کے ابتدائی 10 دنوں کی فضیلت اور عبادات کی اہمیت پر روشنی ڈالی۔
یہ بھی پڑھیں:ایران امریکہ جنگ جلد ختم ہو جائے گی؛ ڈونلڈ ٹرمپ
سعودی حکام کا کہنا ہے کہ عازمین کی سلامتی، رہائش، نقل و حمل اور دیگر سہولیات کیلئے جامع انتظامات کیے گئے ہیں تاکہ حج کا فریضہ آسانی اور اطمینان کے ساتھ ادا کیا جا سکے۔
