ڈیزل کی قیمت میں بڑی کمی کا اعلان
حکومتی اقدام کو عوام کیلئے ریلیف فراہم کرنے اور مہنگائی کے دباؤ کو کم کرنے کی کوشش قرار دیا جا رہا ہے۔
تفصیلات کے مطابق صدر ویلم روٹو نے اپنے ٹیلی وژن خطاب میں اعلان کیا کہ حکومت جون اور جولائی کے قیمتوں کے نئے مرحلے میں ڈیزل کی قیمت میں 10 کینین شلنگ کمی کرے گی، اس فیصلے کا مقصد عوامی مشکلات میں کمی لانا اور مہنگائی کے اثرات کو کم کرنا ہے۔
حکومتی ذرائع کے مطابق یہ فیصلہ حالیہ احتجاج اور پبلک ٹرانسپورٹ ہڑتال کے بعد سامنے آیا، جہاں ایندھن کی بڑھتی قیمتوں کیخلاف شدید عوامی ردعمل دیکھنے میں آیا تھا۔
احتجاج کے باعث ملک کے مختلف حصوں میں معمولات زندگی متاثر ہوئے جبکہ ہلاکتوں اور زخمی ہونے کی اطلاعات بھی سامنے آئیں۔
صدر ویلیم روٹو نے کہا کہ حکومت نے ایندھن کی مسلسل فراہمی یقینی بنانے کیلئے مختلف اقدامات کیے ہیں اور ٹیکس ریلیف سمیت اربوں کینین شلنگ خرچ کی جا چکی ہیں تاکہ قیمتوں کے بوجھ کو کم کیا جا سکے۔
معاشی ماہرین کے مطابق عالمی سطح پر خام تیل کی سپلائی میں مشکلات اور مشرق وسطیٰ میں کشیدگی کے باعث کئی ممالک میں ایندھن کی قیمتوں میں اضافہ دیکھا گیا، جس کے اثرات کینیا سمیت مختلف معیشتوں پر پڑے۔
یہ بھی پڑھیں:ایران امریکا مذاکرات کا دوسرا دور حج کے بعد اسلام آباد میں متوقع
تجزیہ کاروں کا کہنا ہے کہ ڈیزل کی قیمت میں کمی سے ٹرانسپورٹ اور اشیائے ضروریہ کی لاگت کم ہونے کے امکانات پیدا ہو سکتے ہیں، جس سے عام شہریوں کو کچھ ریلیف مل سکتا ہے، تاہم مہنگائی پر اس کے مکمل اثرات آنے والے مہینوں میں واضح ہوں گے۔
