ایران امریکا مذاکرات کا دوسرا دور حج کے بعد اسلام آباد میں متوقع
عرب میڈیا رپورٹس کے مطابق ایران اور امریکا ممکنہ معاہدے کے قریب پہنچ گئے ہیں، ممکنہ معاہدے کے متن کو حتمی شکل دینے کے لیے کام تیزی سے جاری ہے جبکہ معاہدے کے حتمی نکات کا اعلان جلد متوقع ہے۔
رپورٹ کے مطابق پاکستان سے اہم شخصیات کی جمعرات کو ایران روانگی متوقع ہے جہاں جاری سفارتی مشاورت کے دوران معاہدے سے متعلق اہم امور پر تبادلہ خیال کیا جائے گا۔
العریبیہ کی رپورٹ میں کہا گیا ہے کہ ایران اور امریکا کے درمیان مذاکرات کا اگلا دور حج سیزن کے بعد اسلام آباد میں ہونے کا امکان ہے جہاں معاہدے کے حتمی نکات پر مزید بات چیت ہو گی۔
ذرائع کے مطابق مجوزہ معاہدے میں خطے میں کشیدگی کم کرنے، آبنائے ہرمز میں بحری سلامتی اور سفارتی پیش رفت سے متعلق اہم نکات شامل ہو سکتے ہیں۔
سفارتی ماہرین کا کہنا ہے کہ حالیہ ایام میں پاکستان نے تہران اور واشنگٹن کے مابین پسِ پردہ سفارتی رابطوں اور ثالثی کی کوششوں میں فعال کردار ادا کیا ہے جسے مختلف علاقائی ممالک کی جانب سے بھی سراہا گیا ہے۔
یہ بھی پڑھیں: پاکستان کی ثالثی میں ایران، امریکا مذاکرات جاری ہیں: بقائی
دوسری جانب وفاقی وزیر داخلہ محسن نقوی ایک ہفتے کے دوران دوسری مرتبہ ایرانی دارالحکومت تہران پہنچے ہیں، جہاں ان کی ایرانی قیادت اور اعلیٰ حکام سے اہم ملاقاتیں ہوئیں۔
ایرانی میڈیا کے مطابق یہ دورہ ایران اور امریکا کے درمیان جاری سفارتی رابطوں، خطے کی صورتِ حال اور پاکستان کی ثالثی کوششوں کے تناظر میں غیرمعمولی اہمیت اختیار کر گیا ہے۔
