پاکستان کی ثالثی میں ایران، امریکا مذاکرات جاری ہیں: بقائی
برازیلین اخبار کو انٹرویو کے دوران ترجمان ایرانی وزارت خارجہ اسماعیل بقائی کا کہنا تھا کہ بنیادی طور پر جو ہم امریکا سے چاہتے ہیں وہ مطالبات نہیں بلکہ ہمارا حق ہے،ایران پر امریکی پابندیوں کا خاتمہ مطالبہ نہیں بلکہ ہمارے حقوق کا حصہ ہے۔
دوسری جانب ایرانی سپیکر محمد باقر قالیباف نے کہا ہے کہ دشمن کی نقل و حرکت یہ ظاہر کرتی ہے وہ جنگ کے ایک نئے راؤنڈ کی تلاش میں ہے،ایرانی فوج نے سیز فائر کو اپنی طاقت کو مضبوط کرنے کے لئے استعمال کیا ہے۔
ادھر ایرانی پاسداران انقلاب گارڈز کا کہنا ہے اگرایران پردوبارہ حملہ ہوا تویہ جنگ خطے سے باہر تک پھیل جائےگی، پچھلی جنگ میں اپنی تمام صلاحیتیں استعمال نہیں کیں۔
یہ بھی پڑھیں: ایران امریکا جنگ بندی معاہدے میں تعطل، ٹرمپ بے چین
پاسداران انقلاب نے کہا کہ اگر ایران کے خلاف کوئی کارروائی کی گئی تو اس کی نئی علاقائی اور غیر علاقائی صلاحیتیں فعال ہو جائیں گی، اپنی طاقت سوشل میڈیا پر صرف کھوکھلے بیانات میں نہیں، بلکہ میدانِ جنگ میں دکھائیں گے۔
دوسری جانب ایرانی وزیر خارجہ عباس عراقچی نے سماجی رابطوں کی ویب سائٹ ایکس (سابقہ ٹویٹر) پر جاری ایک پیغام میں کہا کہ ایرانی فوج نے حالیہ جارحیت سے کافی آپریشنل تجربہ حاصل کیا ہے، اگر ایران کے خلاف دوبارہ کسی بھی قسم کی عسکری محاذ آرائی کی گئی تو اس کے نتیجے میں دشمن کو مزید سرپرائزز ملیں گے۔
