امریکی طیارہ سمندر میں گرکر تباہ،مسافر معجزانہ طور پر بچ گئے

امریکی حکام کے مطابق دو انجنوں پر مشتمل ٹربو پروپ طیارہ بہاماس سے امریکی ریاست فلوریڈا جا رہا تھا کہ دورانِ پرواز اچانک فنی خرابی کے باعث میلبورن کے ساحل سے تقریباً 80 میل دور اٹلانٹک سمندر میں گر کر تباہ ہوگیا۔

حادثے کے فوراً بعد طیارے سے ایمرجنسی لوکیشن سگنل موصول ہوا، جس پر امریکی کوسٹ گارڈ اور فضائیہ نے فوری طور پر مشترکہ ریسکیو آپریشن شروع کر دیا۔

حکام کا کہنا ہے کہ خراب موسم اور سمندر میں طوفانی صورتحال کے باوجود امدادی کارروائیاں جاری رکھی گئیں۔ ریسکیو مشن میں شریک امریکی فضائیہ کی میجر الزبتھ پیواٹی نے میڈیا سے گفتگو کرتے ہوئے کہا کہ تمام افراد کا زندہ بچ جانا کسی معجزے سے کم نہیں۔

ریسکیو ٹیموں نے جدید ٹیکنالوجی اور فضائی نگرانی کی مدد سے سمندر میں موجود لائف رافٹ کا سراغ لگایا، جہاں تمام مسافر زندگی بچانے والی کشتی میں موجود تھے، امدادی طیارے نے متاثرین کو خوراک، پانی اور حفاظتی سامان بھی فراہم کیا۔

یہ بھی پڑھیں:دنیا کا حیران کن شہر، جہاں سورج 84 دن تک غروب نہیں ہوگا

بعد ازاں تمام افراد کو بحفاظت ساحل تک منتقل کر دیا گیا جبکہ حکام نے حادثے کی وجوہات جاننے کیلئے تحقیقات شروع کر دی ہیں۔